Djadumingu 29 di sèptèmber a tuma lugá e grandioso Klousura di Siman di Kultura 2013. Gobièrnu di Kòrsou, Kas di Kultura, SEFBA, MCB i Refineria Isla Kòrsou a pone forsa huntu i ofresé pueblo di Kòrsou un grandioso Klousura di Siman di Kultura. E di dies edishon di Siman di Kultura a klousurá na Sentro di Bario Koraalspecht. Pa 9 ’or di mainta a hasi apertura di un kompetensha kulinario, den kua partisipantenan a trese platonan di Ántes, Presente i Futuro.  Un hurado distinguí, konsistiendo di Malcolm Helmijr, Clayten Mogen, Charlie de Windt, Roque Angela i Desiree Da Costa Gomez a husga platonan di 5 grupo partisipante: Famia Everts, Tiano’s Kitchen, Kushina di Poppy Victoria, Kushina di Evoniusschool i Grandinan di Mariepampoem/Steenrijk. Pa 9.15 e presentashonnan riba esenario a kuminsá. Despues di un kaluroso bonbiní di e MC, un representante di Sentro di Bario Koraalspecht, sra. Lutania Visser a hiba palabra. A sigui un presentashon masha bunita di Universal Voices. Grupo Rítmiko den Dam a pone tur hende zoya riba nan dushi piesanan. Pa despues sigui un grandioso presentashon di finalistanan di Kantado Mayó 2013, Gremain Genaro i Rashid Felida i Kantadó Mayó mes, Furgel Wijngaarde. Tabatin diferente diskurso. Diskurso tresé pa presidente di SEFBA, sra. Meritza Wernet i direktor di Kas di Kultura, sr. Gilbert Bacilio. E parti final di e programa a konsistí di presentashon di Grupo di baile Cyberclub i Grupo Rítmiko Konchemba, ku pa 16.00 a sera e atardi ku ‘broche de oro’. Pa loke ta trata e kompetensha kulinario, Promé ku a saka premio, Tancleta a haña chèns di purba tur e platonan presentá!. Famia Everts, a gana premio di higiena, mihó plato di Pasado, i mihó smak. Kushina di Evoniusschool a gana mihó plato di Presente i mihó presentashon. Kushina Poppy Victoria a gana mihó plato di Futuro. E ganadó apsoluto a bira Famia Everts. Un públiko kaluroso i animá a disfrutá di e bunita i dushi presentashonnan i disfrutá di e platonan delisioso ku finalmente a ser prepará. E públiko ku a presensiá e programa di Klousura di Siman di Kultura 2013, tabata konsistí tantu di mucha, hóben, adulto komo hende di edat avansá di Koraalspecht i besindario i di diferente otro bario di Kòrsou. Sin duda, por mira bèk riba un dia fenomenal i eksitoso den tur sentido di palabra! Kas di Kultura kier gradisí pueblo di Kòrsou i speshalmente MCB, Refineria Isla, Mongui Maduro Foundation, Ofisina di Turismo, Coca Cola, Wimco i Price Waterhouse Cooper, pa nan aporte i partisipashon na Siman di Kultura 2013.  Danki pa un biaha mas ‘Hasi Grandi bo Kultura i Alsa bo Nashon’.