WILLEMSTAD: Durante di e último dianan klientenan a bin ta eksperensiá algun problema den ‘browsing’- ku ta difikultá nan eksperensia riba Internèt. “Nos a bin ta traha duru pa remediá e situashon. Nos ta eksperensiando un interferensia biniendo for di kanalnan eksterno- ku ta drentando nos red. Esaki ta afektando nos suministro di data. Nos ta hasiendo tur loke ta na nos alkanse pa rekuperá mas lihé ku ta posibel. Klaro, nos ta pidi e kliente pasenshi den e proseso i ta pidi diskulpa pa kualke inkumbinensia”, esaki di akuerdo ku ehekutivonan di e kompania.

E tim tékniko di Digicel ta trahando duru pa huntu ku kompania internashonal Ericsson i tambe Bureau Telecommunicatie & Post aki na Kòrsou pa identifiká e problema i yega na un solushon rápido. Ademas di esaki, ehekutivonan den departamento tékniko di Digicel ta hasi menshon ku no ta tur hende ta eksperensiá e interupshon; e gran mayoria ta hasi uso di nan data manera semper.