Re-apertura di Petting Zoo danki na donashon di mas ku 250 persona

Willemstad – Djadumingu 4 di òktober, riba di dia di animal, a tuma lugá re-apertura di e Petting Zoo na Curaçao Zoo, ántes Dierentuin. Un di e proyektonan, segun e plan maestro di Curaçao Zoo ta pa restrukturá i amplia e “Petting Zoo”, un di e áreanan masha gustá, prinsipalmente serka muchanan. Huntu ku un tim di boluntario i empleadonan di Curaçao Zoo, Friends of the Curaçao Zoo a kuminsá ku e desaroyo pa mehorá e área aki. E konsepto di “Petting Zoo” ta pa kada bishitante hasi un trep rondó di mundu i mira e diferente bestianan doméstiko di otro pais, ku ta repartí den 8 diferente área. Kada un área lo konta un tiki historia di e bestianan i mas ku klaro tur bishitante lo por atmirá, mishi ku e bestianan i duna nan kuminda. 

Friends of the Curaçao Zoo ta un fundashon ku a keda fundá for di 1990 ku e meta pa krea i rekoudá fondo pa yuda mantené, drecha i amplia kuido di nos zoológiko nashonal Curaçao Zoo. Pa hopi tempu i diferente motibu e fundashon no por a ehersé su tarea. Resientemente fundashon Friends of the Curaçao Zoo a logra re-esestablesé un tim dinámiko ku Janis Vinck komo Managing Director di Friends of the Curaçao Zoo i Frits Terborg, Tamara Salsbach, Jouraine Da Costa Gomez, Annouschka Betist i Nataly Lam komo miembro di direktiva. Huntu e tim aki ta hasiendo un tremendo trabou pa krea aktividatnan ku por generá fondo pa di un manera strukturá yuda realisá e plan maestro di nos zoológiko nashonal.

Pa mas ku dos aña Friends of the Curaçao Zoo a kuminsá ku e proyekto di “Standing order” pa rekoudá fondo i yuda den su desaroyo. Entretantu e fundashon a logra entusiasmá mas ku 250 donatùr pa bira amigu di Curaçao Zoo i mensualmente ta sostené e fundashon ku un mínimo di 5 florin pa luna. Ku e sosten aki e tim di Friends of the Curaçao Zoo ta krea diferente proyekto den nos zoológiko nashonal i yuda direktiva sigui traha riba su plan mayó.

Den e promé fase di e plan a kuminsá ku e desaroyo den e área di Kunuku of Curaçao i Zaanse Schans. Si tur kos kana segun plan lo renobá e “Petting Zoo” kompletamente danki na e aporte di tur spònser, donatùr, boluntario i empleado ku ta traha duru dia den dia afó den un lapso di 2 aña di tempu. Segun Hubert Isenia, direktor di Curaçao Zoo, éksito i kresementu di nos zoológiko nashonal ta dependé di donashon i boluntarionan ku ta yuda mantené e parke, kuida i duna e bestianan tur dia kuminda. “Nos ta sumamente agradesido ku e akohida ku nos a haña te ainda di sentenáres di amigu di nos parke di bestia. E plannan pa modernisá, krese i bira un parke kompetitivo ta grandi i hopi variá. Pa hasi esaki nos mester di sosten di hopi mas amigu pasombra e finansa ku ta risibí di gobièrnu no ta yega pa realisá nos plannan. Nos ta hasié pa Kòrsou, nos muchanan i tambe pa atraé turista, pues mas sosten ta mas ku bon biní”,

For di 5 di òktober e “Petting Zoo” lo ta habrí pa públiko, kaminda tur dia lo tin oportunidat, bou di guia, pa duna e bestianan kuminda. Esaki lo ta posibel parti mainta entre 10’or pa 11’or òf di 4’or pa 5’or di atardi. Kuminda ta optenibel aki na parke mes pa un preis di 5 florin. Banda di e atrakshon aki famianan por organisá aktividatnan manera fiesta pa mucha, un anochi di sine òf kualke otro aktividat na un preis rasonabel.

Curaçao Zoo ta pidi henter komunidat pa keda pendiente di su kampaña promoshonal kaminda boluntarionan lo ta na diferente supermerkado pa kolektá i invitá komunidat pa forma parti i amplia e famia di Friends of the Curaçao Zoo. Interesadonan pa bira un donatùr òf boluntario por tuma kontakto ku Friends of the Curaçao Zoo na mail friends@curacaozoo.com òf na number di telefòn 7360188.