Willemstad – E kaminata di CIBC FirstCaribbean, den kuadro di e lucha kontra kanser, definitivamente ta bai subi kaminda den 2013 tambe!  E aña aki atrobe empleadonan, amigu i famianan lo partisipá na e evento aki pa krea mas konsiensia i kontribui na e lucha kontra tur tipo di kanser. CIBC FirstCaribbean den kada un di e 17 paisnan kaminda e banko ta operá den Karibe lo tene nan propio evento i lo uní ku un organisashon nashonal ku ta traha pa e kousa aki.  Mayoria di e eventonan organisá lo tuma lugá durante di fin di Sèptèmber i e promé simannan di Òktober. CIBC FirstCaribbean a organisá e promé di e tipo di evento aki aña pasa komo parti di su di su selebrashon di 10 aña di aniversario.  E kompania madre di e banko na Canada, CIBC, ta den su di 17 aña komo e patrosinadó prinsipal di “Canadian Breast Cancer Foundation CIBC Run for the Cure”, e evento ku ta sirbi komo ehempel pa  CIBC FirstCaribbean.   Den 2012, un kantidat di 13.000 empleado di CIBC, huntu ku nan famia i amigunan a tuma parti na e Canadian Breast Cancer Foundation CIBC Run for the Cure komo parti di e tim di CIBC. E tim di CIBC a kontribuí ku no ménos di $3 mion dor di kolekta, eventonan pa generá fondo i kontribushon di  CIBC Pink Collection™. Danki na e.o. esaki a generá $30 mion en total den 2012 den kuadro di esfuerso aki. Den Karibe, kasi 3.000 empleado di CIBC FirstCaribbean huntu ku nan famia a uni den e evento aña pasá i a kontribuí ku kasi $30,000 na organisashonnan ku ta hiba lucha kontra kanser den henter e region tabata un sosten na e trabou ku nan ta hasi pa pashèntnan di kanser den henter e region Karibense.  E aña aki e enfoke ta mas aun riba generá fondo, ora ku ofisinanan di CIBC FirstCaribbean organisá aktividatnan bou di koleganan, i den sierto kaso hasta klientenan pa generá mas tantu ku ta posibel na bienestar di e kousa. E tim di CIBC FirstCaribbean na Kòrsou ya a kuminsá ku su aktividatnan pa generá fondo pa medio di vários aktividat interno manera e.o. bendementu di kos dushi i pasapalu.  Un di aktividatnan eksitoso tabata e djabièrnènan pa bista jeans.  Durante di e djabièrnènan aki koleganan ku bisti un jeans a kontribuí ku un montante chikí.  E aktividatnan aki no únikamente ta dirigí pa generá entrada pero tambe pa krea mas konsenshi pa e kousa plùs pa kalentá empleadonan, nan famia i amigunan pa partisipá na e kaminata na Kòrsou. “E tim di Kòrsou ta hopi entusiasmá pa partisipá den e esfuerso regional aki di nos banko pa aktivamente kontribuí na krea konsenshi i sosten pa e lucha kontra di kanser.  Nos na Kòrsou ya a komprometé kaba ku Princes Wilhelmina Fonds pa hasi donashon di tur loke nos generá atrabes di e diferente aktividatnan ku nos ta realisá na kaminda pa e dia di e kaminata i durante di e kaminata.  Nos ta spera ku e aña aki atrobe un gran kantidat di kolega, amigu i famianan kana ku nos dor di kayanan di Willemstad” Pim van der Burg, Managing Director Dutch Caribbean a bisa. CEO di CIBC FirstCaribbean, Rik Parkhill a bisa:  “Nos ta sumamente kontentu di ta envolví den un otro esfuerso pa krea mas konsenshi pa un malesa ku tin impakto riba nos tur. Nos tur sa di e istorianan ku nos ta tende ya ku kanser ta un malesa ku ta bati na porta di nos tur den un òf otro forma;  sea ta un miembro di nos famia òf ta un amigu òf kolega òf e realidat di algun di nos ku ta sufri bou di dje òf un persona ku ta lucha kontra di e malesa yen di kurashi.  CIBC FirstCaribean ta sostené tur esfuerso pa lanta e konsenshi di públiko pa tur tipo di kanser, inkluso pa detektá trempan si tin e malesa, tratamentu i e nesesidat agudo pa kura permanente.  Pa e motibu aki tur nos esfuersonan, den kuadro di e kaminatanan ta dirigi riba krea un konsenshi mas amplio.” Banko a habri algun number di kuenta na tur su filialnan rònt Karibe riba kua públiko por depositá nan donashon. E number di kuenta pa hasi donashon ta: “CIBC FirstCaribbean Curacao Walk for the Cure” number di kuenta: 570000718