Djaluna dia 28 di Sèptèmber, den oranan di marduga pa apróksimadamente 04:20AM, a tuma lugá un insidente ku tiramentu kaminda deskonosinan a kousa herida serio na un CAP Airport Police mientras ku e tabata realisando kontròl rutinario riba tereno di aeropuerto. A hiba e viktima hospital pa trata su heridanan. Manera nos tin entendí e ta den kondishon serio, pero stabil. CAP a tuma kontakto ku Polis i tim di investigashon ku aktualmente ta investigando e kaso. CAP ta disidído pa komprondé e sirkunstansianan rondó di e kaso i pa duna su kooperashon na outoridatnan pa por konkluí e investigashon debidamente. A tuma kontakto ku Slachtofferhulp i ARBO pa duna sostén na empleadonan di CAP i miembronan di komunidat di aeropuerto ku tabata presente durante e insidente.

Nos CAP Airport Police ta ehersé e trabou krítiko di tene nos area di aeropuerto i biaheronan safe durante e momentunan ku nan ta realisando aktividat na aeropuerto, i nan ta hasiendo un tremendo trabou diariamente. Aeropuerto di Kòrsou ta un area públiko habrí 24 ora pa dia pa fasilitá aktividat i pa kombinensha di nos biahero i otro usuario. Nos aeropuerto ta kumpli ku tur norma internashonal pa operashon i maneho safe di e fasilidat aeropuerto, un responsabilidat ku gerensha i personal di CAP ta tuma hopi na serio. Sin embargo, CAP ta rekonosé ku komo fasilidat grandi i hopi aktivo, elementonan di sosiedat ku ke hasi malu lamentablemente tambe tin sierto akseso pa e tereno.

CAP lo sigui hasi tur loke ta posibel pa por komprondé i deal ku e asuntunan ku a kontribuí na e kruel, kobarde i inesesario akto di violensha aki, i ta determiná pa siña di esaki i elevá konsientisashon pa ku e tipo di situashonnan aki, pa purba prevení ku insidentenan asina okurí atrobe.

Nos orashon i pensamentu ta seka famia, amigunan, koleganan Airport Police di nos amigu i kompañero, i tambe pa tur otro funshonario ku tur dia atrobe ta pone nan mes den peliger pa protehá nos kontra elementonan maligno.