WILLEMSTAD:-  Fanatikonan ta den gran espektativa pa e ‘tour’ den luna di Òktober di Cache Royal. Despues ku Clifton End, Daniel de Jongh i e siman aki TSean a saka nan kansion promoshonal- ta falta Quincy Amasia só! Anto e ora ei ta klá pa e serie di presentashonnan ku lo tin próksimamente, kuminsando dia 3 di òktober ku OREO den Club Spoonz. Mané nan sá bisa ‘e promé awa ta awa’- i mester menshoná ku ta un di e fechanan mas komentá den e  ‘tour’ di Cache Royal. Esaki spesialmente pasobra ta promé bes ku e dos agrupashonnan ta topa otro den un fiesta. Fanatikonan di ámbos agrupashon musikal lo baila henter anochi, esei ta sigur! Karchinan ta 55 florin den pre-benta, VIP (single) 100 florin. Un kos ta sigur, no tarda pa kumpra bo karchi. Club Spoonz ta ofresé un kantidat eksklusivo tantu den ‘general’ komo den e área di VIP, pa esaki por tuma kontakto ku 513.2841.  Karchinan optenibel na e puntonan di benta ya kustumbrá.

Piesanan di Cache Royal ta zonando ku hopi frekuensia, un biaha mas ta konfirmá popularidat di e banda. “Den skondí” di Clifton End i “Siñami Stima” di TSean ta e gran faboritonan- fanatikonan ta wardando e momentu pa baila nan den fiesta. Claudius Phillips & OREO awòki ku nan piesa nobo “Groovy Chopsuey” tambe ta un kos serio! Un kombinashon “Hopi Dushi” pa garantisá un anochi di hit tras di hit, dia 3 di Òktober den Club Spoonz.