Den kuadro di selebrashon di siman di kultura durante e periodo di 27 di sèptèmber pa 4 di òktober próksimo, gustosamente Sentro Kultural Kòrsou (CCC) ke invitá henter komunidat pa bin selebrá siman di kultura huntu ku nan. E aña aki e selebrashon lo ta dediká na konmemorashon di 65 aña di eksistensia di Sentro Kultural Kòrsou. E aktividatnan korespondiente ta kuminsá djadumingu 27 di sèptèmber pa 3’or di atardi ku un bunita presentashon di baile folklóriko ku lo keda presentá pa e organisashon SKOBA huntu ku nos gran instruktor di baile folklóriko Cesareo Jean Luis.

Eksposishon di Pintura 28/09 – 4 /10

Riba djaluna 28 di sèptèmber te ku djadumingu 4 di òktober lo tin un bunita eksposishon di arte visual komponé pa obra i pinturanan di alumnonan di CCC. Apertura ofishal di e eksposishon lo ta riba djaluna 28 di sèptèmber pa 6’or di atardi i ta tuma lugá den e ouditorio di CCC. E eksposishon mes lo ta habrí te ku djadumingu 4 di òktober i lo ta habrí di 9’or di mainta te 7’or di anochi i ta bou di kordinashon di e konosido artista Morgaine Parris.

Show Musikal 2/10

Riba djabièrnè 2 di òktober lo tin un bunita show musikal presentá pa studiantenan di Akademia di Músika Edgar Palm. E show musikal lo ta di 5.30’or di atardi pa 7’or di anochi.

Manifestashon Kultura 3/10

Riba djasabra 3 di òktober di 5’or di atardi pa 10.30’or di anochi lo tin un manifestashon kultural di KODEKAG ku músika di “kai òrgel”, durante kua lo hasi un homenage tambe na homenahe na Alejandro (Patan) Farro. Durante e atardi aki lo tin demostrashon tambe di baile di gruponan folklóriko. Henter komunidat ta bon biní na Sentro Kultural Kòrsou su selebrashon di Siman di Kultura. Pa mas informashon por yama durante ora di ofisina na telefòn 737-3682 òf via e-mail na info@sentrokultural-korsou.org.