Willemstad, Djadumingu último tabata tin e di 3 oudishon na Sentro di Bario Brievengat. Un kantidat di 17 hóben a partisipá na tayernan ku tabatin den e siman di 14-18 sèptèmber. For di e 17 mucha/hóbennan ku a partisipá 16 a hasi e oudishon. Den e siman aki e hóbennan a haña tayer di baile serka e dosente Swindi Helm, kanto i aktuashon serka Eduard Reinita.

E hóbennan a train duru i huntu ku dosentenan a krea un presentashon ku a habri djadumingu atardi kuné su. Aparte di ta den e presentashon ta tin algun hóben ku a hasi oudishon tambe. Nan a risibí èkstra guia pa por a presentá dilanti hurado. E tema rondó di e presentashon/oudishon aki tabata ku e hóbennan ta alumno di skol i nan mester a prepará pa un presentashon ku lo wòrdu organisá na skol. Pa ku e preparashon aki e hóbennan tabata tin nan ensayo general i e kabes di skol a dirigí esaki. Grandi tabata su sorpresa ora ku na final e la tuma nota ku kuerpo di hurado tabata sintá den e sala. Pues nan a mira hinter e presentashon i a husga e muchanan na mes momentu. E kuerpo di hurado tabata konsistí di: Harlienne Brazil ( Yentje) ku a husga e parti di kanto, pa baile tabatin Jessy Wall i pa aktuashon, John Nagtegaal. Kompetensha tabata fuerte i pa e bario di Brievengat a saka 5 finalista ku ta pasa pa semi final di Luna Yen: Marlusha Americaan(Baile), Stephany Lake(Kanto), Diandra Angelica(Kanto), Guerthson Hooi(aktuashon), Rose Jose(Kanto).

Banko di Caribe, Refineria Isla, Gobièrnu di Kòrsou, Teatro Luna Blou i La Tentashon ta invitá tur mucha/hóben pa tambe demonstrá nan talento. Pa mas informashon tokante Luna Yen www.lunablou.com òf e facebook page: Teatro Luna Blou. Tambe por yama Teatro Luna Blou na 462-2209.