WILLEMSTAD – Mas o menos 2600 boluntario a yuda limpia 255.000 kilo di shushi durante e di tres edishon di Curaçao Clean Up, sin konta Klein Kòrsou. Durante e último 3 añanan ya 1 mion kilo di shushi a ser rekohé. E kantidat rekòrt di partisipante e aña aki ta resultado di un kresementu den e kantidat di hobenan i gruponan di famia, amigu i habitantenan ku ta limpia nan mes bario. E organisashon ta sumamente kontentu ku e desaroyo aki.

Na mas ku 40 lokalidat, for di Klein Curaçao te na area di Ref i di Brievengat te Boka Ascension a limpia menos shushi ku e añanan promé durante di Curaçao Clean Up (498.000 i 278.000 kilo). Esaki ta paso e akshon ta dirigí riba limpia shushi ku ta lastra manera bòter i saku di plèstik, i no shushi di dump, pero tambe pasobra tin menos shushi ku añanan anterior riba nos isla. Presidente di Curaçao Clean Up Maarten Schakel tabata kordiná e area di Brievengat i a nota ku e aña aki mas o menos 75 hende di diferente grupo a limpia alrededor di SDK, inkluso e area di parker. Si kompará esaki ku aña pasá tabata tin mester di 150 hende.

Miembro di e tim di Curaçao Clean Up Lysayé de Windt ta kontentu ku diferente habintantenan a tuma akshon i a organisá nan mes pa limpia nan bario, entre otro na bario di Brievengat, Schelpwijk, Kustbatterij, Willibrordus, Rooi Santu i Kent u Zelf.

E kantidat di hobenan i muchanan ku ta partisipá tambe ta un stap importante, paso un isla limpi ta kuminsá ku edukashon. Gruponan di scouting, di hobenan i skolnan avansá i di fundeshi a partisipá. Curaçao Clean Up a uni forsa ku Greenkidz Curaçao, un proyekto di diferente aña ku ta bai drenta skolnan pa siña nos muchanan kon pa kuida nan medio ambiente. 166 mucha di 4 skol a bai Boka Ascension den bus pa bai limpia shushi ku ta subi nos kosta ku nan lidernan i otro boluntario.

Manera tur aña, sambuyadónan tambe a forma parti di e akshon. E aña aki tabatin 131 persona ta sambuyá i aña pasá nos tabatain 125 persona. Remarkable ta ku bou di awa tambe tabatin menos shushi, pero si a logra saka 2 kaska di bròmer for di awa na Directeursbaai.

E organisashon di Curaçao Clean Up ta hasi un apelashon na Kòrsou kompletu pa ta mas konsiente di kon nan ta trata ku medio ambiente i pa no tira shushi den mondi òf riba kaya. E organisashon ta hasi un yamada na gobièrnu pa implementá e leinan di medio ambiente pronto i pa kuminsá duna but na esnan ku no ta respetá nos medio ambiente. Curaçao Clean Up ta spera ku no mester di un akshon di limpiesa masal mas, pero lo sigui si tin mester i lo no para na banda mira Kòrsou keda shushi.