Reunion tumando luga entre representantenan di Aviacion Civil y Aeropuerto di Reino Hulandes

Representantenan di Aviacion Civil conhuntamente cu Aeropuerto di Corsou, Boneiro, Sint Maarten y Aruba recientemente a reuni pa discuti posibilidad pa introduccion di un sistema yama One-Stop Security, entre e islanan di Reino Hulandes.

One-Stop Security ta encera reconocimento di maneho di siguridad entre e islanan. Di e forma aki asina un vuelo cu tuma luga entre Corsou, Boneiro, Sint Maarten y Aruba, na momento di aterisahe henter, e proceso di siguridad di e pais origen di e vuelo ta e keda reconoci y no mester ripiti esaki nobo. Cu otro palabra pasaheronan lo tin e posibilidad pa drenta areanan restringi na aeropuerto directamente despues desembarca e avion sin tin nodi pasa dor di henter e proceso di siguridad un biaha mas.

E lo facilita transito di pasaheronan entre paisnan cu ta firma e acuerdo den forma di un Memorandum of Understanding. Durante e reunion a discuti e posibilidad tambe pa considera di inclui otro paisnan manera Hulanda y Merca.

Pa Minister Otmar Oduber esaki ta un paso mas cerca di e plan y vision di Gobierno di Aruba, pa percura di comberti Aruba den un hub entre Europa y Merca. Cu introduccion di One-Stop Security, lo traduci den facilitacion di cualkier vuelo di negoshi y habri un sin fin di posibilidad.

E ekipo cu ta trahando riba e proyecto importante aki ta cla pa sigui cu e proceso y percura pa tur rekisitonan necesario pa tin One-Stop Security ta concretisa y cla pa implementa den luna di maart 2016.