Willemstad – 25 Sèptèmber 2013- Djarason último grupo di karnaval Grand Cache a duna un presentashon espektakular di su trahe di Karnaval 2014. Dilanti un grupo grandi di miembro i futuro miembro di e grupo kompañá pa prensa a presentá e trahe ku lo karga komo tema: ‘Den Balansa’ Ya ba basta aña grupo di karnaval Cache a sa di duna su kontribushon den nos marcha di Karnaval na un manera espektakular ku su trahenan eksepshonal i 2014 Grand Cache lo kontinuá ku su leyenda ku otro trahe impaktante. Durante di e presentashon ku a wòrdu tene den Club Bananas tur presente por a atmirá e trahe di tantu hende hòmber, hende muhé i esun poko mas sexy. Ademas di esaki a duna splikashon amplio di e tema di e trahe i a pone énfasis riba eventonan pendiente pa rekoudá fondo. “Grand Cache ta sumamente orguyoso di por a presentá su trahe ‘Den Balansa’; a tuma tempu, dedikashon i mas ku tur kos union di kreatividat inmenso pa por a krea i presentá e trahe aki.  Nos kier a gradisí tur nos miembronan di Grand Cache pa e konfiansa i lealtat ku nan a demostrá atraves di añanan i nos no por lubidá prensa ku semper ta kontribuí ku Grand Cache. Karnaval 2014 Grand Cache lo bai ‘Den Balansa’ perfekto”, esaki di akuerdo ku Kenny Chin-A-Lien, presidente di grupo di karnaval Grand Cache.