Manera ta konosi den medionan di komunikashon, Gobiernu di Boneiru e aña aki a enkarga Hype Marketing & Events pa organisa e di 48 Regatta International di Boneiru. Faltando menos ku un luna pa esaki, por bisa ku preparashonan ta kanando den ful swing pa asina organisa un eksitoso Regatta 2015 tantu pa loke ta trata karedanan riba laman i e festival di Regatta.
Ta konosi tambe ku Regatta lo bai bek na su sitio kaminda ku esaki a inisia esta na Playa Lechi miho konosi komo Sunset Beach. Tur esaki nan lo tuma luga durante 4 dia esta di djarason 7 di oktober pa djasabra 10 di oktober 2015. Apertura di Regatta 2015 lo ta djarason 7 di oktober mientras ku karedanan riba laman lo ranka sali djaweps 8 di oktober.
Fecha di inskripshon pa partisipantenan ku kier kompeti pa karedanan riba laman lo ta djarason 7 di oktober i a enkarga Sr. Viktor Wijnand pa kordina tur aktividat relashona ku kompetensianan riba laman. Pa loke ta trata e festival di Regatta, Hype Events huntu ku Massive Productions ta preparando un tremendo ‘set-up’ pa pueblo di Boneiru i su bishitantenan por disfruta di un tremendo festival di Regatta nunka bisto ku un esenario ku hopi efekto di lus, huma i kandela.
Lo bai tin presentashon di gruponan di baile, brassband, djnan lokal/internashonal, bandanan krioyo i artista i bandanan lokal/internashonal. Coco Beach (Sunset Beach) lo bai ta transforma kompletu ku diferente sekshon esta ku diferente stènt di kuminda i artesania. Riba beach durante dia lo bai tin entre otro kompetensianan di bolas, volibol I futbol. Lo bai tin tambe un huki pa mucha ‘kids corner’ unda nos muchanan por disfruta di Regatta 2015. Pa klousura e di 48 edishon di Regatta 2015 lo bai tin un tremendo ‘Boat Party’ na Coco Beach (Sunset Beach) riba djasabra 10 di oktober kuminsando for di 1’or di Merdia ku ambiente di Grupo Eso, Dj Outkast, Dj Nutzbeats, Dj Ro-1, Dj Veloce i Dj Marvv.
Atrakshonan prinsipal riba e anochinan di Festival di Regatta lo bai ta Era Outentiko riba djarason , Doble R riba djaweps, Cache Royale riba djabierne i Alison Hinds riba djasabra pa klousura Regatta 2015. Relashona ku esaki nos kier a gradisi tur nos sponsernan i esnan prinsipal ku no a duda niun ratu so den Regatta 2015 I Hype Events kual ta Gobiernu di Boneiru, Kla Mobile, Massive Production, Don Andres I Amstel Bright I tur otro sponsor. Segun dianan ta aserkando lo bai tin mas rueda di prensa pa pueblo ta bon na altura di Regatta 2015. Pa mas informashon of pregunta relashona ku Regatta 2015 por manda un email na hype.events@hotmail.com of check e website di regatta www.bonaireregatta.org