Diabierna durante un acto oficial conhuntamente cu famia Nicolaas, Monumentenbureau, Stichting Monumentenfonds y Geerman Contractors a haci develo di e bortchi di construccion na Nicolaas Store. Esaki ta e simbolo cu oficialmente e proyecto di restauracion di Nicolaas Store ta inicia. Directora di Stichting Monumentenfonds, Anne Witsenburg ta bisa: “Nos a warda hopi tempo pa prepara pa e proyecto aki y porfin e dia special a yega.”

Minister Otmar Oduber a percura pa Nicolaas Store bira un di e puntonan di enfoke den e plan di desaroyo di San Nicolas. E monumento lo bira un Community Museum cu lo haya su cafe den dje, unda nos bishitantenan lo por intercambia historia cu nos localnan y siña un poco mas di nos cultura. E monumento Nicolaas Store ta un edificio data for di añanan 30 cu awor ta cla pa haya un bida nobo.

Famia Nicolaas a mira e momento aki cu hopi emocion. Nieta di Noni Francisco Heronimo Nicolaas doño di Nicolaas Store, Sra. Stellamaris Nicolaas ta conta cu na 1936 su wela Petrovilia Patricia Nicolaas Semeleer a yega Aruba cu su 5 yiu muhenan unda henter e famia a biba na e parti ariba di Nicolaas Store. Su mayornan a conoce otro na 1944 unda e prome nieta Marvel Nicolaas a nace den e monumento aki. Sra. Nicolaas ta sigui bisa:”E ta hopi dificil pa mi describi mi sentimentonan, nos tur e 8 rumannan a lanta y biba di e luga aki. Nos ta hopi contento si cu e edificio awor ta haya su debido atencion.”  Ainda ta fresco den su memoria e shopping nightnan cu Nicolaas Store tabata tin. Benta di carchinan di Pasco, carchinan di Aña nobo y sin lubida e cuerde di guitara y violin pa toca dande. Sra. Nicolaas ta sigui conta: “Tabata tin te hasta carchi pa 3 rey cu ta dia 6 di januari. Aña nobo ta tur hende tabata bin busca nan suerte akinan, nan sencia. Nicolaas Store tabata duna nan suerte pa bolter aña.” Famia Nicolaas ta hopi contento cu e edificio awor lo keda restaura treciendo asina hopi bunita memoria bek cu lo por traspasa pa e siguiente generacionnan.

E tempo stipula pa e trabounan di restauracion lo ta aproximadamente 1 aña. A desea e contratista tur clase di exito mirando cu e ta un proyecto importante pa Aruba henter specialmente pa San Nicolas y di cual tambe tin hopi expectativa p’e.