Willemstad – Resientemente, Steven Coutinho di RBC Royal Bank, a hasi un bishita spesial na e sekshon di Remedial Teaching di Marnix School (Skol di Fundeshi). RBC ta sostené diferente projekto i programa edukativo riba tereno di enseñansa den su totalidat i enseñansa spesial. en partikular Durante di e bishita Managing Director, Steven Coutinho, alabes a entregá un chèk pa un aporte finansiero na e sekshon di Remedial Teaching pa duna rekonosimentu i premia e trabou balioso ku trahadónan den e sekshon aki ta aportá na dje.

E remedial teacher tin komo un di su tareanan mas prinsipal, e guia di alumnonan ku mester di atenshon spesial. Esaki ta e alumnonan ku por haña un retraso den nan desaroyo pa motibu di un retraso den nan enseñansa. E retraso aki por ta okashoná dor di un inteligensia abou, pa motibu di un defisiensia edukatibo (p.e. Dyslexie o Dyscalculie), dor di un defisiensia di komportashon (ADHD), un defisiensia di konsentrashon (ADD) of dor di tiki motivashon di parti di e alumno òf e mayornan/edukadónan.

E alumnonan aki lo keda registrá serka e remedial teacher (RT’er) dor di e maestro, despues di kua e RT’er lo kolektá informashon di e alumno i di su situashon inisial. Esaki ta sosodé pa medio di opservashon di e alumno paden i pafó di klas, dor di hasi tèst ku e alumno i/o analisá tèst ku e alumno a traha kaba.

E RT’er despues ta traha un plan di akshon ku lo keda palabrá ku e mayor/edukadó i e maestro di e alumno. Despues di un periodo di 6 siman ta sigui un evaluashon kaminda ta disidí si ta terminá, sigui of referí e kaso pa yudansa partikular/bijlès. Durante hinter e proseso ta sostené kontakto ku e mayor/edukadó.

Otro tarea di e remedial teacher ta inkluí ofresé sostén na e maestronan, un aktitut aktivo pa ku e dominashon, profundisashon i ampliashon di e konosementu i abilidat didáktiko i señalá puntonan di preokupashon riba nivel di grupo i di skol.

RBC ta rekonosé e importansia di un desaroyo sano di kada mucha i ta aploudí programanan di e tipo aki i ta kontribuí na duna e aporte nesesario pa garantisá kontinuidat di e desaroyo sano di nos muchanan.