WILLEMSTAD— E di tres edishon di Curaçao Clean Up, riba djasabra 19 di sèptèmber ta aserkando. Organisadónan ta yama tur persona ku kier partisipá  pa inskribí den e siman benidero via di www.curacaocleanup.com. Inskripshon ta sera un siman promé ku e akshon di limpiesa grandi aki.

Diariamente tin varios inskripshon di boluntarionan individual, pero tambe di famia, grupo di amigo i kompanianan ku ta drenta ku kier kontribuí na un Kòrsou mas limpi i bunita. E promé edishonan a konta ku entre 2000 i 3000 hende. E organisashon lo kier yega mas o menos e mesun kantidat di hende.

Sigur awor ku nos tin un lei di medio ambiente ku a ser aprobá dor di Staten, nos ta mas motivá ku nunka pa hasi i tene Kòrsou limpi, segun tesorero Corinne Senior. “Awor a yega e momentu pa nos sigi dal bai, pa nos mustra ku nos kier un Kòrsou limpi ku nos por ta orguyoso di dje, i ku Kòrsou ta fada di hende ku ta benta nan potoshi riba kaya.”

Curaçao Clean Up ta tuma lugá na 40 lokalidat rònt Kòrsou. Gruponan ta topa for di 7 or di mainta na nan lokalidat kaminda nan lo haña instrukshon i material, manera hanskun i saku di shushi pa nan por bai man na obra. Lo tin algu di bebe i un snèk durante mainta tambe. Despues lo tin un ‘afterparty’ na Chill Beachbar na Sea Aquarium.

Gruponan i individual por inskribí fasilmente via di www.curacaocleanup.com. Riba e site por skohé lokalidat deseá ku ainda tin disponibel.