Curinde ta lamentá e kandela ku a kima un di su lotsnan den nos Zona Liber na Koningsplein.  Un total di 16 empresa a kedá afektá dor di e kandela. Curinde mientrastantu ya ta hasiendo tur loke ta den su alkanse pa akomodá e klientenan ku a keda afektá di tal forma ku mas pronto posibel nan  por sigui hasi negoshi den nos Zona Liber.  Outoridat tin e kaso den investigashon.  Gerensia di Curinde ta kombibí ku su klientenan i nan empleadonan i ta spera ku pronto e empresanan aki por ta den operashon bek.

Djamars 1 di sèptèmber pa mas o ménos algu pasá di 7’or di anochi, gerensia di Curinde a keda notifiká di e suseso lamentabel den Zona Liber Koningsplein. E edifisio ku a kima ta tin un superfisie total di 5.684m² dividí den diferente espasio.  E lots ta sigurá.

Curinde miéntras tantu ta hasiendo su máksimo esfuerso pa akomodá kada kliente afektá den otro edifisio den Free Zone Koningplein mes di tal forma ku kada un por sigui ku nan aktividatnan i brinda servisio na e bishitante/kumpradónan di Zona Liber.

Finalmente, gerensia di Curinde ke suprayá su kompromiso pa siguí traha na bienestar di Zona Liber i su klientenan en partikular miéntras ta  kontinuá ku e trayekto pa alsa e kalidat di produkto den nos Zona Liber i tambe generá mas aktividat ekonómiko pa Kòrsou atraves di nos Free Zone.