Despues di festival dianan 4 i 5 di Sèptèmber próksimo no bai kas!

WILLEMSTAD- Sèptèmber 2015 – Tur hende ta klá pa disfrutá di e próksimo fin di siman. Antisipando un aglomerashon di hende rondó di e área na Piskadera, Marriott Resort Curaçao i Emerald Casino ta anunsiá nan popular ‘after party’. Evitá e reinan largu i tráfiko despues di Curaçao North Sea Jazz (CNSJ) i forma parti di Marriott su ‘CNSJ After Party 2015’. Esaki ta un manera perfekto pa kontinuá ku e selebrashon musikal na Marriott su ‘Lobby Area’ den un ambiente ameno yená ku bon músika ku kos di kome i di bebe.

Marriott Resort Curaçao su ‘CNSJ After Party 2015’ ta tuma lugá dianan 4 i 5 di sèptèmber despues di e festival pues lo kuminsá 12’or en punto. Jilly’s Band ku lo sòru pa un repertorio ku ta ‘fit’ e ambiente di CNSJ. Entrada pa e ‘After Party’ lo ta grátis. Pa esnan ku ta deseá di parker nan outo riba tereno di Marriott durante di e dos dianan di festival por hasi esaki pagando solamente Naf. 50.00 / $ 29 pa anochi. Ta sugerí pa hasi reservashon adelantá mirando ku e kantidat di lugá di parker ta limitá. Marriott Resort Curaçao i Emerald Casino ta invitá pueblo di Kòrsou pa despues di CNSJ bishitá Mariott su ‘Lobby Area’ i disfrutá di un ‘After Party’ tur afó!