Kas di Kultura ku koperashon di Caribbean Film Board i Curacaose Kunstkring i sosten di Mongui Maduro Foundation i MCB ta ofresé e aña aki, durante Siman di Kultura, un dokumental tokante e legendario pianista i kompositor  yu di Kòrsou Wim Statius Muller titulá Nostalgia. Den e dokumental akí e ekspektadó  ta sera konosí ku un hòmber ku pashon i amor pa arte i músika en partikular.  Sr. Wim Statius Muller no únikamente a eksponé muzik di Kòrsou den e mundu di músika klásiko pa piano mundialmente pero tambe a komponé  diferente Wals, Tumba i Dansa. Durante mas o ménos un ora, Wim Statius Muller ta duna e ekspektadó entrada na su bida. E ta konta di su karera laboral i trayektoria musikal. Bo ta eksperenshá tambe su perseveransha pa keda desaroyá e don ku el a risibí. E dokumental  akí ta produsí i dirigí pa Alaric Alexander Smeets i editá pa Keiran Watson-Bonnice. Dia 24 di sèptèmber alumnonan di Maris Stella VSBO  i MIL a presensiá Nostalgia. Sr. Wim Statius Muller i sr. Alaric Smeets ku tabata presente na Cinemas durante di presentashon dje dokumental a keda impreshoná ku e interakshon i preguntanan ku a surgi di parti di e alumnonan di skol avansá. Dianan 25 i 26 di sèptèmber próksimo Marnix College i SKAI lo tin oportunidat di presensiá Nostalgia. Ku inisiativanan asin’aki Kas di Kultura ke yuda amplia konosementu di baluartenan di Kòrsou i formashon kultural di spesialmente hóben. Huntu nos ta sigui Hasi Grandi nos Kultura i Alsa nos Nashon!.