KFC Curaçao ta gradisí komunidat di Sta. Rosa pa 5 aña di lealtat:

Willemstad- Sèptèmber 2013; Tabata na aña 2006, ku Sr. Hubert van Grieken, empresario propietario di HUCOR Holding N.V. a puntra den un reunion pa direktiva si esnan den e hunta tin idea pa konstrukshon di un KFC nobo pa Kòrsou. Tur hende tabata unánime den e pensamentu ku region di Sta. Rosa tambe meresé nan restorant di KFC. E konstrukshon di KFC Sta. Rosa a kuminsá den e di dos mitar di aña na 2007, e promé blòki a keda pone dor di Sr. Tony Lowens, direktor general di KFC Latino Amérika & Caribe. Na 2008, a finalisá konstrukshon i riba 14 di Sèptèmber di e mesun aña a habri porta di KFC na Sta. Rosa. E promé mènèdjer tabata Sr. Antonio De Paulo, te dia di awe ainda Sr. De Paulo ta manehá e restorant na Sta. Rosa; debí na e aparensia similar di Sr. De Paulo i Colonel Sanders, klientenan ta komentá ku KFC Sta. Rosa ta e úniko restorant ku su ‘propio’ Colonel. Ademas di e ambiente diferente, KFC Sta. Rosa ta konosí pa su drive-thru lihé i servisial. Ta interesante hasi menshon ku KFC Sta. Rosa na mas ku un okashon a keda rekonosé komo e restorant di KFC na Kòrsou ku e mihó puntuashonnan den servisio general i ekselensia na kliente. Djabièrnè último KFC Sta. Rosa a selebrá nan di 5 aniversario; esaki a tuma lugar den ambiente ku tur empleado, klientenan fiel i empleadonan di tur otro empresa ku ta pertenesé na HUCOR Holding N.V. Durante di e selebrashon a rekonosé empleadonan ku a destaká i ku durante di 5 aña a demostrá dedikashon na e kompania i su klientenan. KFC Sta. Rosa ta habri tur dia for di 11’or di mainta pa 11’or di anochi tantu drive-thru i e restorant na unda por sinta kome, bebe i disfrutá di e delisioso menúnan di galiña original i tan gustá. KFC ta un kompania Halal i tin 7 filial na Kòrsou, ademas di Sta. Rosa tin Sta. Maria, Saliña, Brion Plein, Punda, Brievengat i Colon. Riba foto athuntu por mira henter e tim di KFC Sta. Rosa huntu ku 2 di nan klientenan fiel, tambe por haña un impreshon di e selebrashon ku a tuma lugar djabièrnè último na momentu ku KFC Sta. Rosa a selebrá nan 5 aniversario.