Proyekto pa siña nos muchanan ahedres den bario

WILLEMSTAD- Sèptèmber 2013: Djarason último Banco di Caribe a hasi un donashon na Curaçao Chess Academy (CCA), e organisashon ku pa algun aña kaba  ta duna atenshon spesial na un  proyekto di ahedres pa muchanan ku ta bishitá skolnan di fundeshi na Kòrsou. “Ahedres a bira masha popular durante di e último añanan. Awendia no ta adulto so ta hunga ahedres pero e wega a haña un interes grandi serka hóbennan tambe. Nos ta aploudí e inisiativa di CCA pa e proyekto akí ku ta na benefisio di nos muchanan. Pa  e motibu aki  Banco di Caribe ta hasi un kontribushon signifikante”, Asina Sr. Fons Simon, CEO di Banco di Caribe a bisa djarason último na entrega di e chèk simbóliko. Curaçao Chess Academy ya pa algun aña tin un proyekto di ahedres pa muchanan ku ta bishitá skolnan di fundeshi. E proyekto ta enserá ku muchanan ku ta bai skolnan di fundeshi por akudí  na lèsnan di ahedres den sentronan di bario. Ahedres ta un wega ku ta rekerí hopi konsentrashon, ku ta yuda e manera di pensa, ademas di esaki e ta yuda e mucha ‘focus’ i ta motivá pensamentu stratégiko. No ta fásil pa siña un mucha e wega di ahedres. Pa garantisá un bon splikashon di e wega, CCA ta hasi uso di instruktornan ku siñansa pedagógiko. Banco di Caribe ta kontentu di por aportá na un proyekto asina importante pa desaroyo positivo di nos muchanan. Riba foto athuntu por mira momentu ku Sr. Fons Simon ta hasi entrega di e cheque na representantenan di Curaçao Chess Academy (CCA).