Djadumingu 22  di sèptèmber a tuma lugá e grandioso Apertura di Siman di Kultura 2013. Gobièrnu di Kòrsou, Kas di Kultura, SEFBA, MCB i Refineria Isla Kòrsou a pone forsa huntu i ofresé pueblo di Kòrsou un grandioso apertura di su Siman di Kultura. E di dies edishon di Siman di Kultura a ranka sali na Sentro di Bario Wishi/ Marchena. Pa sink’or di atardi a habri e eksposishon AnteAwor, ku ta mustra interior di un kas estilo ántes i di awor. Pa mitar di seis e presentashonnan riba esenario a kuminsá. Despues di un kaluroso bonbiní di e MC, Pastor Eugene Huybregts a hasi apertura ofishal di e atardi ku un orashon. Despues a sigui algun palabra di representante di Direktiva Sentro di Bario Wishi/ Marchena, sra. Ghijsbertha. Grupo Zamar a deleitá un públiko entusiasmá ku algun piesa di alabansa ku a kai mashá na smak.      Despues e siguiente personanan a hiba palabra: representante di Direktiva di SEFBA, sra. Místika Lauffer, Vise presidente di Direktiva di Kas di Kultura, sr. Aubert Wiels i Minister Whiteman na nòmber di Minister Interino di Enseñansa, Kultura i Deporte. Un públiko grandi i alegre a disfrutá di e bunita i dushi presentashonnan di grupo Simia di Uniritmo,  Angelitos,  Artistanan di Arte di Palabra, KreaDanza, Parehanan di baile di SKOBA,Shantal Huybregts, Cesareo’s Dance Creation i Grupo Power. Por a mira bon kla tantu den e eksposishon komo den e diferente presentashonnan kultural artístiko, e liña kòrá: ‘Pasado, Presente i Futuro’. E públiko ku a presensiá e programa di Apertura di Siman di Kultura 2013, tabata konsistí tantu di mucha, hóben, adulto komo hende di edat avansá di Wishi-Marchena mes i di diferente otro bario di Kòrsou. Sin duda, por mira bèk riba un dia fenomenal i eksitoso den tur sentido di palabra! Kòrda pasa buska bo buki ku informashon di Siman di Kultura 2013 na Kas di Kultura, Koningin Wilhelminastraat 1. Kas di Kultura ta invitá hinter komunidat di Kòrsou pa ‘Hasi Grandi bo Kultura i Alsa bo Nashon’. Organisá i partisipá na aktividatnan kultural durante di e siman aki. Laga kultura di Kòrsou sigui brota den tur skina di Kòrsou. I dia 29 di sèptèmber, bin klousurá Siman di Kultura 2013 huntu ku nos na Sentro di Bario Koraalspecht for di 9or’ di mainta te 4or’ di atardi.  Nos ta wardabu!