Digicel i Fuoco Restaurant ta felisitá atletanan i entrenadornan di Special Olympics Curaçao pa nan logro


WILLEMSTAD:- Ougùstùs, 2015Djarason último Digicel a demostrá su apresio na atleta- i entrenadornan di Special Olympics Curaçao. Resientemente nan a regresá for di Los Angeles, California ku un gran kantidat di medaya ku nan a logra gana den e World Summer Games.  E tim di Kòrsou a partisipá den diferente disiplina e.o Aquatics, Bowling, Hisamentu di Peso i Bolas. Un total di 16 atleta di Kòrsou a kompetí den e olimpiada na unda ku a logra konkistá 24 medaya; 4 oro, 10 plata i 10 bròns. Fuoco Restaurant a hasi donashon di un sena na e tim di Special Olympics Curacao. E tim kompleto a haña un rekorido den diferente departamentu na Digicel Biesheuvel. Digicel komo kompania ta kontribuí na Special Olympics den mayoria di su merkadonan ku inyekshonnan finansiero importante pa fasilidatnan atlétiko, coach, ekipo i proyektonan di integrashon sosial ku ta inkluí aktividatnan deportivo. Hans Lute, direktor di Digicel Kòrsou a komentá djarason atardi, “Nos presidente, Denis O’Brien a kontagiá nos tur ku ta forma parti di Digicel ku e  pashon pa yuda Special Olympics i atletanan spesial den tur merkado na unda ku nos ta operá. Sinembargo nos esfuerso no ta di kompará ku esun di tur entrenadó, boluntario òf famia ku tur dia di nobo ta yuda e atletanan spesial den nan meta pa sobresalí. Di e forma aki nos ke selebrá huntu ku boso e resultadonan di World Summer Games. Nos ta masha kontentu di invitá boso pa un sena di selebrashon. Danki na Fuoco Restaurant pa forma parti di e gesto aki. Disfrutá! ”.