WILLEMSTAD – En preparashon pa Curaçao North Sea Jazz Festival, Hotèl Avila ta organisá un biaha mas un konsierto masha spesial di jazz titulá “Moonlight Magic”. E biaha aki e hotèl konhuntamente ku e barku krusero Freewinds lo sòru pa un anochi fenomenal. E dos artistanan tòp di e barku krusero, Michele Henderson i Carmel Helene, huntu ku e banda di Freewinds (inkluso dos tremendo artista lokal) lo deleitá e públiko ku nan mihó repertorio riba Avila su Octagon Plaza dia promé di Sèptèmber.

Artistanan

Carmel Helene, nasé na San Francisco a kuminsá su karera artístiko den e género di rock, pero seguidamente el a haña su kaminda den músika jazz i country. El a presentá ku entre otro, Luis Miguel, Seal, Babyface, Rihanna i Miley Cyrus. Michele Henderson a nase na Grand Bay, Dominica. For di su infansia e la haña su pashon pa kanto i en partíkularmente pa músika jazz. Michele tambe ta un atrakshon pa e públiko internashonal.

E damanan atraktivo i simpátiko ku stèm intenso, kargá ku karisma lo wordú kompañá pa e banda musikal di e krusero Freewinds ku ta konsistí di John Poli Takis (drùm), Geoff McLernon (bas), Susan Lora (teklado), Patrik Zagury (kitara i direktor musikal). Giovanni Maduro i Pernell Saturnino, artistanan lokal bon konosí, ku no mester di ningun introdukshon lo kompañá e orkesta riba e anochi aki.

Freewinds i músika

Freewinds ta mashá entusiasmá pa traha huntu ku Hotèl Avila na e presentashon aki, komo parti di e apertura di e eventonan rondó di Curaçao North Sea Jazz Festival. Kòrsou ya pa 30 aña kaba ta fungi komo e base prinsipal pa e krusero Freewinds. Durante e temporada aki Freewinds tabata tin sentenares di evento na bordo ku miles di bishitante, na eventonan pa rekoudá fondo pa entre otro gruponan di servisio lokal, organisashonnan no-gubernamental, institushonnan karitativo, fundashonnan i movementunan hubenil. Bastante artista lokal hopi konosí, a yega di presentá durante e eventonan aki riba e krusero. E barku aki ta un plataforma tambe pa diferente streanan hóben ku ta lantando riba nos isla. Esaki ta kuadra perfektamente ku e karákter musikal di Hotèl Avila i prinsipalmente Avila su Blues Bar i restorant, ku for di 1992 ta esenario pa tantu talentonan hóben komo artistanan lokal famá i internashonalmente konosí. Manera kustumber lo opsekiá e suma ku a generá ku e konsierto di dia promé di Sèptèmber na Hotèl Avila na un bon kousa. E biaha aki a skohe pa e donashon keda destiná pa “Curaçaose Muziekschool” CCC.

Puntonan di benta

Karchi di entrada pa e konsierto di jazz ta kosta solamente Nafl. 37,50 i ta optenibel na Mensings Caminada, Albert Heijn i Hotèl Avila. E konsierto riba Octagon Plaza ta kuminsá 19.30 i portanan lo habri 18.30. Lo tin un kantidat di asiento disponibel den kombinashon ku areanan di lounge. E evento ta wordú hasí posibel den koperashon ku Freewinds i PwC.