Kaminda nos selekshon nashonal lo bai topa El Salvador próksimamente! E orario definitivo di e promé enkuentro entre nos selekshon i El Salvador ta konosí!
Manera ya ta konosí nos selekshon nashonal lo tin ku enfrentá El Salvador den e terser buèlta di e weganan pa eliminatorio pa mundial Rusia 2018. E promé partido lo tuma lugá aki na Kòrsou djabièrnè 4 di sèptèmber pa 6:05pm den Stadion Ergilio Hato (SDK) miéntras e segundo partido lo tuma lugá aya na El Salvador den ‘Estadio Cuscatlán’ djamars 8 sèptèmber próksimo pa mitar di 8 di anochi. E desishon definitivo a kai ku e partido mester kuminsá 6.05pm en punto. Esaki debí ku lo tin transmishon ‘live’ internashonal di e partido Kòrsou vs El Salvador dia 4 sèptèmber den stadion Ergilio Hato pa e kompania Traffic ku tin e derecho eksklusivo di transmishon. Nos lo no duda ku kompanianan di gobièrnu pero tambe empresanan priva lo koperá ku tur empleado ku ke bin sostené nos selekshon nashonal komo e number 12 pa por baha un tiki mas trempan pa asina bin disfrutá di e gran partido aki. Esaki, mes kos ku sa pasa durante festividatnan kultural grandi manera karnaval. E lista definitivo di nos hungadónan ku lo bai representá nos den e terser buèlta di e weganan di eliminatorio pa mundial Rusia 2018, ta konosí! Nan ta e siguiente hungadónan:
- Roly Bonevacia
- Shanon Carmelia
- Elson Hooi
- Luidjino Hoyer
- Gino van Kessel
- Darryl Lachman
- Gianlucca Maria
- Michaël Maria
- Rhu-Endly Martina
- Quentin Martinus
- Shelton Martis
- Vidarell Merencia
- Rihairo Meulens
- Dustly Mulder
- Gevaro Nepomuceno
- Jeremy de Nooijer
- Zeus de la Paz
- Eloy Room
- Rowendy Sumter
- Charlton Vicento
- Jason Wall
- Kemy Agustien
- Guyon Fernandez
Karchinan ya ta na benta i e preisnan pa karchi pa e diferente sekshonnan ta lo siguiente: VIP ta kosta Nafl. 500,- (inkluí konsumo); (maksimal 500 persona) Bou di tribuna kubri ta Naf.100,- (maksimal 1000 persona) Bou di tribuna kubri parti Festival Center ta Nafl.75,- (maksimal 1000 persona) Tribuna no kubri ta Nafl.30,- te ku 31 di ougùstùs, promé di sèptèmber e karchinan lo bira Nafl.35,-. Den e sekshon aki mucha te ku 12 aña i 60+ ta paga Naf.20.- (maksimal 8000 persona) Karchinan ta optenibel na FFK bou di ora di ofisina, na Pòmp di gasolin Sta Maria, Botika Mampuritu, 4th of July na Barber, Beep Beep Rio Canario, Mensing’s Caminada, na tur filial di C-Post N.V. i na Biep Tiew & More na Berg Altena. Benta di suèter i shal ta kontinuá na FFK na balor di 35 i 25 florin. Un súplika ta bai na abo, komo e number 12 ku no tin bo suèter òf shal ainda pa kumpra esaki paso e ora 0 ta yegando! Nos ta pidi tur fanátiko, e number 12, pa kumpra bo karchi trempan pa bin sostené i apoyá nos selekshon nashonal komo e number 12! Nos selekshon i nos hungadónan ta konta kubo sosten masal den SDK djabièrnè 4 di sèptèmber pa 6:05pm!