Djaluna awor, 17 di ougùstùs,  ta konmemorá  e echo ku 220 aña pasá a tuma lugá na Kòrsou e gran rebelion di katibu bou di liderato di Tula i su kompañeronan. Ta e fecha ku Gobièrnu di Kòrsou na 1984 a proklamá ofisialmente komo “Dia di lucha pa libertat”. E aña aki atrobe Asosiashon Promoshon Konsenshi Istóriko i Plataforma Sklabitut i Herensia di Sklabitut,  ta organisá un grandioso konmemorashon na Parke Lucha pa Libertat na Ref riba: Djaluna  17 di ougùstùs di 7 o’r pa 10 or’ di anochi Lo tin un programa kultural hopi variá ku deklamashon i baile di Exel Arts Academy, músika di grupo Sablika i kanto di Herliane Silvanie kompañá ku presentashon di teksto i fragmentu di e akontesimientunan di e rebelion di 1795. E aña aki e konmemorashon ta den kuadro di e lema: 1795: LUCHA PA LIBERTAT! 2015: BAN KONTINUA KU E LUCHA PA MAS EMANSIPASHON!! Ku e lema aki nos ke ekspresá ku na 1795 katibunan mester a lucha pa logra nan libertat, ku  a nifiká un paso grandi riba e kaminda largu di emansipashon di nos pueblo. Awor na 2015 ta nos deber pa kontinuá ku e lucha pa logra mas emansipashon riba tur tereno di bida pa pueblo di Kòrsou. Esaki por logra solamente si nos traha riba nos konsenshi históriko ku ta un di e yabinan pa desaroyo di nos nashon. Inspirá pa e lucha di Tula nos ta bolbe invitá pueblo pa ban konmemorá viktoriosamente i ku firmesa: “Dia di Lucha pa Libertat”, Djaluna awor, 17 di ougùstùs, na Parke Lucha pa Libertat na Ref. Na nòmber di A.P.K.I. i Plataforma Sklabitut i Herensia di Sklabitut, Drs. Frank Quirindongo