Diamars atardi Sr. Ewald Kurt Biemans a ricibi e sorpresa cu oficialmente e tin un caya na su nomber. Den presencia di personal di Bucuti & Tara conhuntamente cu famia, amistadnan, representantenan di Ministerio di Turismo, AHATA, Aruba Tourism Authority y invitadonan special a desvela e borchi di e caya na entrada di Bucuti & Tara Beach Resort como Caya Ewald Kurt Biemans. Ta asina cu na momento cu Ministerio di Turismo a ricibi e peticion pa haci un reconocemento oficial na honor di Sr. Biemans, no a pensa 2 biaha y a presenta esaki den Conseho di Minister unda den un forma unanime a bay di acuerdo cu e nombracion di caya pa un persona cu a y ta sigui contribui asina hopi den e industria turistico y tambe un di e pioneronan pa loke ta trata sostenibilidad riba nos isla. DOW a haci nan maximo esfuerso pa por a cumpli cu e peticion aki mirando cu normalmente tin un cantidad di rekisitonan cu mester cumpli cu ne pa por haya un reconocemento di forma aki. Pero den e caso di Sr. Biemans a haci un excepcion mirando cu ta trata di un pionero asina valioso den varios aspecto di e industria turistico y sostenibilidad, cu un trayecto extenso. Minister Otmar Oduber no por tabata presente durante e celebracion di e desvelo di caya Ewald Kurt Biemans, pero a manda su palabranan di felicitacion. A traves di su consehera Minister Oduber a manda e mensahe: “Personalmente mi ta hopi orguyoso di su logronan y mi ta admira Sr. Ewald Biemans como un ehempel pa nos tur. Masha danki pa e contribucion enorme na nos turismo y pabien cu un otro bunita logro.”