WILLEMSTAD – Djasabra 22 di ougùstùs ta bai tin pa di 4 aña e gran apertura di KJ hoops i pa di dos aña konsekutivo di KJ smash organisá pa KJ 74, fundashon di nos famoso pelotero Kenley Jansen.

Ku enfoke riba deporte e tim di KJ 74 ta traha duru pa por realisá e torneo pa tantu basketbòl i vòli tur aña di nobo. E meta prinispal di e fundashon aki ta pa motivá i enkurashá tur hóben di Kòrsou pa praktiká deporte mas tantu i forma parti di un tim. Di e forma aki sigur nos ta sòru di engrandesé deporte aki na Kòrsou. Pa logra tur nos metanan pa ku deporte nos tin mester di apoyo di tur siudadano entre otro di e mayornan. Pues di e forma aki KJ 74 ta invitá un i tur pa bin eksperensiá e gran apertura kaminda un otro temporada dushi di KJ hoops i KJ smash lo kuminsa dia 22 di ougùstùs 2015. Tur kos lo kuminsa for di 3or di atardi aya den sala di deporte Ergilio Hato (SDK). Nos ta konta ku boso presensia i sosten na nos muchanan. Nos ta kontentu di por partisipá ku por sigui mantené entrada kompletamente grátis danki na e inmenso aporte di Refineria Isla i tambe Pinnacle Sports. Pueblo di Kòrsou bin disfrutá di un dushi ambiente i show presentá pa Lord of Gravity. Un grupo di acrobat masha popular i konosí na Europa. Si bo tabata presente na e apertura di aña pasá bo sa ku e aña aki bo no por keda afo. Pa mas informashon bishita nos Facebook página www.facebook.com/kj74.hoops òf www.facebook.com/kjsmash.