Willemstad 11 di ougùstùs 2015- Nos zonanan liber i parke industrial semper a kontribuí na nos desaroyo ekonómiko. Resientemente un grupo di alrededor di 65 alumno di SGO Jacques Ferrandi VSBO a bishita nos Zona Liber na Koningsplein i e parke industrial na Brievengat. Curinde banda di e zona liber na Koningsplein i e parke industrial na Brievengat ta manehá i operá e zona liber na banda di aeropuerto. Curinde, na okashon di selebrashon di su 35 aña, a hasi un donashon na SGO Jacques Ferrandi VSBO pa asina nan por sigui ku e trabou importante di forma e hóbennan afin ku nan ta bira profeshonalnan bon ekipá pa drenta e proseso laboral.

Nos zonanan liber i parke industrial ta brinda trabou na un bon kantidat di persona diariamente. P’esei ta importante pa nos hóbennan ta na altura ku aki tambe lo por tin oportunidat pa nan gana nan pan den futuro. Banda di hasi e rekorido na Koningsplein i parke industrial na Brievengat e hóbennan di SGO Jacques Ferrandi VSBO a haña tambe un bon splikashon di e trabou ku Curinde ta realisá pa por perkura pa un klima adekuá pa kompanianan por operá i hasi negoshi sea ta for di un di zonanan liber of nos parke industrial na Brievengat. E hóbennan, durante di e bishita na parke industrial na Brievengat, a haña oportunidat tambe pa bishita e fábrika di Lovers ku ta den parke industrial na Brievengat.

Curinde di e forma aki ta kontribuí na amplia e bista di hóbennan riba posibilidatnan di empleo ku nos pais ta ofresénan pa futuro..