Willemstad – Curaçao Airport Partners (CAP) a registrá sifranan di tráfiko di biahero aereo positívo na Curaçao International Airport den e di dos kuartal di 2015. A konstatá un oumentu di 3% pa loke ta trata e kantidat total di biahero registrá na aeropuerto den e di dos kuartal di 2015, kompará ku e di dos kuartal di 2014. Mes kos ku den e promé kuartal di 2015, e kantidat di biahero ku a yega i ku a sali ku buelo internashonal a oumentá respektivamente ku 2% i ku 3% den e di dos kuartal di 2015, kompará ku e di dos kuartal di 2014. No tin kambio pa loke ta trata buelonan doméstiko ku ta sali (buelonan pa e islanan Karibe Hulandes), kompará ku e di dos kuartal di 2014. Biaheronan ‘transfer’, pues biaheronan ku no tin Kòrsou komo nan destinashon final, a oumentá ku 5% kompará ku e di dos kuartal di 2014.

Durante e di dos kuartal di 2015 e kantidat di biahero ku a yega for di Europa a oumentá ku 3% kompará ku e di dos kuartal di 2014, kual ta resultado di subida di kapasidat di stul. E impakto di e servisio adishonal di JetBlue for di New York a resultá den un oumentu di 15% na biahero for di Merka durante e di dos kuartal di 2015 kompará ku e di dos kuartal di 2014. E merkado di biaheronan ‘transfer’ ta permanesé instabil dor di e situashon ekonómiko i polítiko na Venezuela, i aki por a konstatá un oumentu modesto den e di dos kuartal di 2015 kompará ku e di dos kuartal di 2014. E merkado di Merka Latino a baha ku -12% durante e di dos kuartal di 2015 kompará ku e di dos kuartal di 2014. E bahada a ser kousá dor di Venezuela; esaki, no opstante e servisionan adishonal di InselAir i di Avior for di Venezuela durante e di dos kuartal. E kantidat di turista di estadia (stay-over) for di Venezuela a baha ku -28% durante e di dos kuartal di 2015, kompará ku e di dos kuartal di 2014. A registrá un oumentu di 5% di e kantidat di tursista di estadia for di Colombia durante e di dos kuartal di 2015, kompará ku e di dos kuartal di 2014. Pa loke ta trata e merkado ‘biahe di plaser’ for di Colombia, tin e espektatíva ku esaki lo sigui krese ya ku riba e ruta aki e biahero no ta rekerí un visa.

“E tráfiko di biahero aereo ta sigui desaroyá riba un manera positivo prinsipalmente riba e merkadonan Europeo i Merikano, ounke ku e luna di Yüni, di kua ta konosí ku e sa ta e luna mas trankil, tabata un reto pa Kòrsou. E pronóstiko pa e temporada di verano i otoño ta fuerte”, segun CEO di CAP Ralph Blanchard. “Analisando e sifranan di e trèntnan i e ‘business outlook’ pa sobrá di 2015, nos ta premirá un aña eksitoso huntu ku nos partnernan CTB i CHATA”.