Diadomingo dia 9 di Augustus a tuma lugar na Muju Korea e World Children Taekwondo Culture Festival 2015 y Brazil Taekwondo Stichting a participa cu 5 atleta. E World Children Taekwondo Culture Festival ta pa mucha te cu 13 aña di faha di color y faha preto elite. E muchanan a wordo categorisa den nan peso, edad y categoria. E prome atleta pa bringa tabata Joshua Klabér kende a topa Kazakhstan pa di dos biaha na Korea caba. E atleta di Kazakhstan a domina su pelea for di e promer rond caba avansando cu un score di 3-2. Den e di dos rond Joshua Klabér a trata di haci un come back pero e atleta di Kazakhstan a sigui cu su atakenan y Joshua Klabér no tabata por mas y mester a keda satisfecho cu su derota di 5-3 den e di dos rond. Despues tabata turno di Danon Delamore kende no a mustra niun respet pa su contrincantenan for di Korea. Tur cu a para su dilanti a haya un taste of “Train Hard Fight Smart” for di Danon Delamore. Danon Delamore a demonstra cu e la bin pa bringa, mustrando esaki den su peleanan. Danon Delamore a usa diferente scopnan pa asina score cu tur tecnica pa asina gana for di e dos Koreanonan. Rasheed Lowe kende ta un di nos favoritonan pa medaya no a hunga cu e Koreanonan. Un di e Koreanonan a bandona e veld cu lagrimanan di su derota bringando na cas. E di dos Koreano no tabata sa ta kiko a dale asina duro y a trata di score, pero Rasheed Lowe tabata hopi skerpi den su atake y contra atakenan buscando e puntonan mas halto den tur dos su peleanan contra di Korea. Justin Arrindell “Lazy” a haya Italia kende a mustra for di su prome atake cu e no tabata tin miedo di Justin Arrindell y a cuminsa ataka Justin Arrindell. Justin Arrindell a trata di score, pero e Italiano tabata mas liher den tur su contra atakenan, lagando Justin Arrindell su tras. Despues tabata turno di Hakeem Lowe kende a topa cu Italia tambe, pero Hakeem Lowe a bringa den contra atake, te ora cu Clifford Rasmijn a hala su atencion pa asina e cuminsa bringa y busca su puntonan. Esaki a duna su fruto y a pone cu e Italiano no tabata sa ta kiko a dale asina duro y a tilt e pa un rato. Hakeem Lowe a logra di domina e pelea te na final. Asina e 5 atletanan di Brazil Taekwondo Stichting a demonstra e lema di “Train Hard Fight Smart” ganando 3 medaya di Oro y 2 medaya di Plata na e World Children Taekwondo Culture Festival 2015 na Muju, Korea.