Na nòmber di Asosiashon di Transporte Aéreo Latino Amerikano i Karibense (ALTA) i su Miembronan di Kompania di Aviashon ku ta representá 90% di tráfiko den e region Latino Merikano i Karibense, mi ke gradisí boso di ta huntu ku nos awe. Aviashon ta un parti vital di e ekonomia mundial, i e ta generá desaroyo ekonómiko den e region i mundialmente. Pa motibu di su geografia aviashon ta hunga un papel klave den Karibe, pasobra transpòrt aéreo ta esensial pa konektá komunidatnan leu i islanan. Karibe Hulandes no ta un eksepshon, ku su teritorionan insular ku ta separá for di otro pa sentenar di kilometer. Aki aviashon no solamente ta perkurá pa desaroyo di komersio i turismo, sino e tin un ròl sosial klave tambe den konekshon di negoshi, amigu i famianan den e diferente partinan di Karibe Hulandes. Biahamentu i turismo ta hunga un papel masha importante den e desaroyo ekonómiko di e region. Segun e Konseho Mundial di Biahamentu i Turismo, biahamentu i turismo ta responsabel pa 14.6% di PBD i 13% di empleo, loke ta posishoná e region aki na promé luga den kontribushon ekonómiko di biahamentu i turismo kompará ku kualke otro region na mundu. Mihó bisá: Karibe ta e region ku ta dependé mas tantu di biahamentu i turismo pa desaroyo di su ekonomia. Tráfiko di pasahero na den Karibe a krese ku un promedio di 6.2% último sinku ana, pero mester nota ku trafiko den Karibe a pasa den un trend ku ta baha, ku un kaida di 2% na aña 2013 i 4% na 2014. E pronóstikonan di término largu di tráfiko, ta mustra un kresementu di tráfiko den e region di entre 5.2% i 6% pa aña te 2034, mas haltu ku e promedio mundial di 4.6%-4.9% ku a proyektá. Tin un kantidat di faktor ku ta afektá e petishon pa biahe aéreo, pero kosto ta esun di mas importante. Nos a haña sa ku tin un estudio di InterVISTAS ku ta investigá e impakto di impuesto riba teket di buelo den aviashon na Kòrsou. E estudio ta menta prueba empíriko ekstensivo di trafiko ku a disminuí komo resultado di un oumento den impuesto/preis di teket, i algun kaso kaminda a kita e impuestonan aki pasobra e pèrdida di bentaha ekonómiko pa motibu di pèrdida di tráfiko tabata mas grandi ku e entradanan di impuesto. Den e kaso spesífiko di Kòrsou, InterVISTAS a konkluí ku un oumento di US$24 den impuesto/preis di teket lo resultá den un redukshon di 6.5% di tráfiko di pasahero, loke ta representá mas ku 93.000 pasahero. Gobièrnunan ta hunga un papel klave den desaroyo di transpòrt aéreo, pa medio di definishon di e maneranan di maneho ku ta establesé e ambiente ku e industria lo operá aden. Aki ta bal menshoná algun maneho ku bista riba futuro manera esun proponé pa e Organisashon di Estado Karibense Oriental, di kua e ministernan di Turismo a aseptá un prinsipio pa redusí mas tantu posibel e impuestonan i preisnan di teket di buelo pa yunan di tera ku tabata biaha entre paisnan miembro, komo un manera pa sostené konektividat. Tambe ta bal la pena pa pone atenshon riba algun opservashon di promé minister di Bahamas Perry Christie, ku el a hasi na e Konferensia di Kabesnan di Gobièrnu di CARICOM. Promé minister Christie a rekonosé e papel vital ku turismo ta hunga den desaroyo di ekonomianan di e region karibense, bisando : “Pa mayoria di nos paisnan turismo ta e doño di trabou di mas grandi. Pa tur nos paisnan turismo ta apsorbé e alkanse mas amplio di abilidat di tur sektor ekonómiko. Pa tur nos paisnan turismo ta esun sektor kaminda no ta eksistí rekuperashon sin empleo. Ta nèt e índole di turismo ta pidi pa tuma mas hende na trabou ora tin mas bishitante.” Prome minister Christie ta kontinuá di bisa ku mester tuma akshon pa baha e haltura di impuesto i preis riba teket di bula, komo ku “[…] por tin un argumento ku e bentahanan sosial i ekonómiko ku por saka di un oumento di pasahero ta surpsá e impuestonan ku a kita”. Mirando e proposishon pa oumentá gastunan na Curaçao Airport, nos ta kere ku ta masha importante pa mantené un vishon stratégiko di término largu di e kontribushon amplio di aviashon, espesialmente mirando su ròl klave den desaroyo di turismo. ALTA ta kompletamente dediká na koperashon ku Gobièrnu di Kòrsou i tur interesado pa sigurá e implementashon di un proseso honesto i husto pa pone preis aeronòutiko ku ta na benefisio di e industria i e pais.