WILLEMSTAD,- E promé finalista nan di Luna Yen 2014, grupo SAG a presentá na e final di Gang di Arte 2015 na Aruba.

Shaheedy Aniceta, Michelle Kunst, Daymaris Lacruz i Andres Herrera ta e promé finalista nan di Luna Yen 2014, e show di talento pa hubentut. E organisashon di Gang di Arte a invitá e kuater hóbennan aki pa presentá na e final di Gang di Arte 2015 titulá Fiesta. Nan tabata e invitadonan speshal di e anochi.

Esaki no ta e promé biaha ku finalista nan di Luna Yen ta haña e oportunidat pa presentá na Gang di Arte.

Gang di Arte i Luna Yen tin e mes un meta. Esaki ta pa desaroyá e talento di hóbennan. Tur aña di nobo hóbennan di Aruba i Kòrsou ta hasi un interkambio kultural Artístiko, kaminda nan ta kompartí ku otro nan eksperienshanan.

Grupo SAG a presentá djamars dia 28 di yüli na Cas di Cultura Aruba komo invitadonan speshal despues ku hurado a retirá pa saka e ganadó di Gang di Arte 2015. Un sala kompletamente yen a disfrutá di e lokura di Kòrsou.

Kuater loko den un sanatorio mental a trese diferente aspektonan di bida dilanti. Ku un toke humorístiko pero ku un mensahe potente su tras nan a trese nan skèch dilanti.

Teatro Luna Blou, La Tentashon i naturalmente Luna Yen ke gradisí Gang di Arte pa e invitashon. Danki na Banco di Caribe, Refineria Isla i Gobièrnu di Kòrsou pa por hasi e kompetensha di Luna Yen posibel i duna e hóbennan e chèns pa ekspresá aki na Kòrsou.

Un danki na Minister di Cultura. Sr Otmar Oduber y Departamentu di Cultura Aruba pa e aporte na e presentashon di grupo SAG na e final di Gang di Arte anto na InselAir Kòrsou pa hasi e buelo di e hóbennan aki posibel.

Nos ke invitá tur hóben ku tin 14 aña òf mas pa inskribí for di awor na e próksimo temporada di Luna Yen 2015. Ya bo tambe por ta un di esnan ku por bishita Hulanda òf Aruba pa bo representá Kòrsou i mustra bo talento.

Pa mas informashon por tuma kontakto ku Teatro Luna Blou na 462-2209 òf yama òf 524-8525. Por bishita nos website www.lunablou.com  òf mail nos na production@lunablou.com