Hakeem Lowe di Brazil Taekwondo Stichting a perde su pelea contra di Korea 13-15. Clifford Rasmijn kende a prepara Hakeem Lowe ta satisfecho cu e resultado di 13-15. Hakeem Lowe tabata den un poule di 14 atleta, cual 5 tabata Koreano. Hakeem Lowe a bringa den e categoria di Junior -45 kilo cu ta un categoria mas halto di locual e mester bringa aden. Esaki por zona straño, pero na e Korean Open nan no conoce Cadet cu ta muchanan entre 12 pa 14 aña. Aki nan ta considera mucha te cu 13 aña y junior for di 14 pa 16 aña y senior for di 17 aña. Cu Hakeem Lowe a perde pa 2 punto no ta nada for di sla, paso e la bringa den un categoria mas halto.

Hakeem Lowe a habri su combate ta pone e Koreano bou curatela y e Koreano no a spera e atakenan di Hakeem Lowe na unda cu Hakeem Lowe a termina e promer rond 6-3. Den e di dos rond Hakeem Lowe a bin cu e mesun strategia, pero e Koreano a recupera su dolor di cabez y a logra empata e score 8-8. Den e di 3 y ultimo rond cos a bay un tiki for di sla, nan no a duna Hakeem Lowe su 3 punto pa cabez y a honra e peticion di e Koreano. Hakeem Lowe kende a keda cu e gana di gana for di un Koreano, lo haya un oportunidad mas den e dianan 23-26 di Augustus na e campeonato mundial di Cadet na Muju, Clifford Rasmijn lo keda hunto cu Hakeem Lowe pa asina logra nan meta. Henk Meijer kende ta e groep begeleider tabata kier mas for di e pelea di Hakeem Lowe y a mira cu e la perde di chiripa.

Diasabra ta turno di Jendrique Gumbs, Záhyon Klabér y Jourdé Klabér. Diadomingo ta turno di Justin Arrindell y Rasheed Lowe, mientras cu Danon Delamore y Joshua Klabér lo crema e Korean Open. Despues di e Korean Open Henk Meijer ta bay sigui cu e plan pa asina por completa e plan di Korea.