WILLEMSTAD — Despues di e promé tres anochinan di charla i tayer, e wikènt di 20 pa 22 di sèptèmber ta bai bira sumamente interesante. E aktividatnan di fin di siman aki ta bai kuminsá ku primeramente presentashon di dos orkesta hubenil ku ta bai presentá na Públiko músika na nivel i di tur género. Nos ta referí aki na e presentashon di djabièrnè dia 20 di sèptèmber di 7 or pa 10 or di anochi riba Plenchi di Ambiente na Curaçao festival Center. Pa e aktividatnan aki a ekspandé e stage riba plenchi di ambiente lo ser transformá den un sirkuito di ambiente. Durante e anochi aki lo tin presentashon di Junior Allstar Orchestra di Kòrsou bou di direkshon di Gedeon Chandler i tambe di Ebony Youth Steel Orchestra for di St. Maarten bou di direkshon di Mighty Dow. Promé Minister di Kòrsou Presidènt Ivar Asjes na e okashon aki tambe lo hiba palabra. Entrada ta grátis.Djasabra 21 di sèptèmber lo tin presentashon di Ebony Youth Orchestra bou di direkshon di Mighty Dow i Junior Allstar Orchestra bou di Gedeon Chandler rònt di Pool Terrace na Hotel Venetto. Aki tambe entrada ta grátis. E orario ta di 7 or pa 11 or. Durante di e presentashonnan aki e públiko lo por mira hóbennan for di 7 aña pa ariba demostrá nan talentonan. Ta e intenshon pa invitá Djuric Virginie, Dibo Doran i tambe Urvin Jano pa kanta un piesa kompañá pa Junior Allstar Orchestra e anochi aki.
Djadumingu dia di Famia:
E dia aki ta primintí di bira sumamente interesante. E aktividat ta kuminsá for di 11 or di mainta i ta tèrminá 11 or di anochi. For di den oranan di mainta te atardi ta bai tin diferente aktividat manera wega di dominó entre gruponan musikal, diferente kushina ku spesialidat di diferente agrupashon musikal i lo tin músika di DJ durante oranan di dia. Un i tur por drenta Curaçao Festival Center grátis den oranan di mainta pa asina ei nan por kumpra nan kuminda prepará pa e diferente bandanan musikal. For di 6 or di atardi te na final lo tin presentashon di diferente grupo musikal manera entre otro Junior Allstar Orchestra, Youth Steel Orchestra di St. Maarten, GIO, ERA, TUNE, Danza, Dreams, WESU i Master Key. Durante oranan di anochi pueblo engeneral lo por selebrá e 45 aña di AMAK, bailando riba tononan di nos mihó agrupashonnan musikal. Durante tur e aktividatnan aki lo tin bar i kushina bon surti i na preis di pueblo. Entrada despues di6 or ta 5 florin. Asosiashon di Músiko i Artista di Kòrsou ta hasi un invitashon na pueblo di Kòrsou pa asistí na tur aktividatnan riba dianan djabièrnè 20, djasabra 21 i djadumingu 22 di sèptèmber awor.
