Diabierna anochi e team di “Train Hard Fight Smart” di Brazil Taekwondo Stichting cu a biaha pa Korea a wordo bon ricibi na nan yegada, door di un grupo di camara di television di Korea cu a bin graba y yama bon bini na e prome grupo di Taekwondo cu a yega Korea pa participa na e Korean Open. E presidente di e organisacion di e di 10 Korean Open Oh, Su ill a bin pa yama e team bon bini y haci entrega di flor na e gran maestro di Taekwondo Hall of Famer y ex campeon mundial Henk Meijer.

Oh, Su ill Presidente di Korean Open a informa cu tin 56 pais a registra cu mas di 2000 participante na e di 10 Korean Open cu ta haci e Korean Open un di e eventonan di mas grandi cu tin actualmente y cu cada aña ta sigui crece door cu e ta un campeonato G2. Hopi pais ta participa pa asina nan por score mas punto pa nan ranking di Taekwondo. Oh, Su-ill tabata masha contento pa tin un team di 8 atleta di un pais asina chikito cu ta yama Aruba y cu a bin participa na e di 10 Korean Open. Pa Clifford Rasmijn y e team ta nan promer biaha na Korea y nan a wordo bon ricibi door di e presidente di e organisacion hunto cu television, cual a laga nan sinti hopi importante. Oh, Su-ill ta hopi contento di por tin participacion for di rond mundo y cu tin hopi interes pa participa na su evento y cu kier competi cu su pais. E team di “Train Hard Fight Smart” ta masha contento pa ta na Korea y nan sa cu nan meta ta pa gana medaya ya cu nan a bay asina leu pa logra esaki.

Alberto Klabér ta convenci cu e team di “Train Hard Fight Smart”  no a bay Korea pa snoep reis, pero ta bay conta e medayanan cu nan a bay pa gana pa demonstra cu nos ta ariba e caminda corecto. Mester duna Henk Meijer su merito pa tur locual e la haci pa asina e team di “Train Hard Fight Smart” por a yega asina leu pa representa Aruba.