Willemstad – Un gesto uniko i bunita ku no sa sosode masha ta e echo ku un kompania ta yuda un grupo di personanan ku malesa kroniko/mental, nos grandinan ku ta habita den un instituto i tambe un hoben ku ta kanta kantikanan ku mensahenan di Dios na mes momentu. Esaki ta loke a tuma luga na momentu ku ACOYA Hotel Suites & Villas a disidi di yuda tur nos hende grandinan di Stichting HAMIËD pa nan por bai wak e konsierto & Show di e hoben ShamiroAnita, titulá “Kalma E Tormenta”, gratis. ACOYA ta konosi komo un dje projektonan mas bunita i eksklusivo di Suites & Villas na Korsòu. HAMIËD ta un fundashon ku duna kuido na persona ku malesanan kroniko, fisiko, mental i/of paliativo di tur edat i tambe un dushi luga di biba pa nos hende grandinan, kaminda kuido i salu ta na prome luga. Normalmente ta hopi difisil pa e personanan aki por bai presensia un konsierto di e magnitut aki den WTC sin yudansa finansiero. Ku e gesto grandi aki Acoya Private Residence Club ta yuda e fundashon i Shamiro tambe p’e por desaroya den su musika. Ahinda falta mas sponsors paso tin gruponan di mucha, hende grandi i personanan deshabilita ku tambe mester di un gesto asina pa nan por bai presensia e Konsierto & Show aki. E Gran Konsierto aki lo tuma luga djasabra 8 di augustus 2015 den e Exhibition Hall di WTC kuminsando 7.30 di anochi. Ta trata di un kombinashon di shownan espektakular pa henter famia disfrutá di dj’e. Lo ta bai tin kanto ku musika varia, un Live Band, Megachoir, Light & Fire Show, Sku Dancing, Baile i Stilt Walking i hopi sorpresa mas. Shamiro ta yama danki na esnan a i ta dunando na aporte pa hasi e konsierto aki posibel i tambe na su sponsornan ku, entro otro UTS, Howard Johnson Hotel,  Studio 8,  Building Depot, Refineria Isla, Japan N.V., Clarion Hotel i CBA. Karchinan ya ta obtenibel na Mensing, Tik Tak, Koko Loko, Beep Beep, Kas di Beibel i Kingdom Experience. Preis di karchi adelanta ta solamente fl.35,– Riba e potret por mira representantenan di Acoya Private Residence Club ku a  entrega e karchinan dje konsierto “Kalma E Tormenta” na e habibante i empleadonan di fundashon Stichting “HAMIËD”, den kompania di Shamiro Anita.