Durante e ultimo lunanan Minister Otmar Oduber a brinda oido na e chauffuernan di autobus di tanto San Nicolas, Noord y Santa Cruz. E chauffuernan a trece padilanti diferente punto cu tin nan precupa. Entre otro e situacion di stationamento di nan busnan. No ta un secreto cu e situacion den nos centro di cuidad specificamente e stationamento dilanti di e edificio di “Doña Clara”, no ta esun mas organisa na e momentonan aki. Minister Otmar Oduber a mentiona cu ta evaluando con pa acomoda e busnan pa por cumpli cu nan demanda. Un ehempel lo ta pa reubicanan den espacionan defini den e mesun area pa den un forma mas organisa cada districto ta haya nan propio espacio. Pa locual ta trata e situacion na San Nicolas, mientrastanto ta haciendo uso di e espacio di parkeo di Carnival Village tanten cu no tin niun evento. Esnan di Noord kier purba keda mas serca posibel di unda nan ta ubica na e momento aki. Papiando di infrastructura, un otro topico ta e posibilidad pa crea un facilidad pa e chauffuernan. Nan lo desea un facilidad cu por brinda bañ y un poco sobra. Esaki lo tuma su tempo pero durante di reunion a surgi algun idea cu a corto plazo lo por alivia e falta di un espacio adecuado pa e chauffuernan. Pa e ultimo 8 añanan e tarifa di autobus ta 2.50 Florin. A yega e momento segun e chauffuernan, pa aumenta esaki. Nan a pidi Minister Oduber, cu na su turno ta evaluando e idea di e cambio di tarifa. E chauffuernan kier mira un aumento di 1 Florin. E mandatario ta splica “Mi sa cu pa e ultimo añanan e tarifa aki ta uno defini y nos no por aumenta esaki na 3,50 florin sin mas ya cu esaki meser cana su caminda legal.” E reunion tabata uno cu a bai den bon ambiente y cada un di e chauffuernan di autobus a keda satisfecho cu e mandatario su attencion. Minister Oduber a compromente cu den transcurso di otro siman lo duna contesta riba e peticionan.