Un lokura total ku su presentashon…
WILLEMSTAD.- For di despues ku a bira konosí ku Jandino lo presenta su show nobo ‘Hoe dan ook’ na Kòrsou, e lokura pa karchi pe evento a kuminsá i mester bisa ku benta di karchi ta bayendo masha bon.
Debí na e interes inmenso, HTF Productions a hañ’é obligá di bai un otro sitio i spesialmente pa su fanátikonan a pone un show èkstra.
Riba djaweps, 6 di ougùstùs i djabièrnè 7 di ougùstùs 2015, Jandino Asporaat ku ‘Hoe dan ook’ lo ta riba tarima di Plasa Octagon na Avila Hotel. Plasa Octagon lo keda kombertí den un anfiteater kaminda porta lo habri pa 6.30 di anochi i show ta kuminsá 8’or.
Presis dos aña pasa, den luna di ougùstùs 2013, ku Jandino durante di 2 anochi a presenta riba Plasa Octagon ‘sold out’. Jandino Asporaat den luna di yüni 2014 a skibi historia na momentu ku ela bira e promé kabaretero Hulandes ku a duna un show di komedia ‘sold out’ den Ahoy. E show por sierto tabata e klousura di un tour eksitoso di teatro kaminda e kabaretero di orígen Kurasoleño a logra di atraé mas di 100 mil bishitante na su presentashonnan.
Spesialmente pa su fanátikonan na Kòrsou, Jandino lo duna dos show di ‘Hoe dan ook’ riba Plasa Octagon di Avila Hotel. ‘Judeska’ di ‘FC Kip’ tambe lo forma parti di e show.
Karchinan ta na benta na rason di 75 florin (OB inkluí) na Mensing’s Caminada, Albert Heijn, Van der Tweel Supermarkt i via di FunMiles.
Esnan ku a kumpra nan karchi kaba por keda ku esaki, e karchi lo ta bálido pa e presentashon di djabièrnè, 7 di ougùstùs. E karchinan pa e presentashon di djaweps, 6 di ougùstùs 2015 lo ta optenibel entrante djasabra awor, 18 di yüli 2015 pa 12’or di mèrdia na tur punto di benta.
E evento aki ta bira posibel danki na e spònser prinsipal Amstel Bright i tambe pa kortesia di Manrique Capriles, Fun Miles, Insel Air, SMS Attorneys at Law, Curacao Tourism Board, Massive Productions, Avila Hotel i Radio Dolfijn.
Sòru pa dia 7 di ougùstùs bo tei, paso ‘Hoe dan ook’ te bira un éksito. Kon ku para bo tei gosa di un tremendo show i disfrutá di e presentashon di Jandino. P’esei ‘kon ku para’, sòru pa bo tei, paso e tambe lo tei ‘kon ku para’!.