WILLEMSTAD – Yüli 2015– ‘The Bahamas National Children’s Choir’ ta selebrá su di 25 aniversario, meta di e koro hubenil aki ta pa hasi kambionan positivo den bida di muchanan di Bahamas via di kanto i músika. Tur aña e kor nashonal di mucha ta bai un gira pafó di Bahamas pa laga e muchanan eksperensiá diferente kultura, estilo di músika i pa laga mundu sera konosí ku e kultura i músika di Bahamas. Awe, 16 di yüli e kor ku ta konsistí di aproksimadamente 25 mucha di skolnan públiko i privá lo ta di bishita na Kòrsou i lo duna un presentashon riba e stage di Rif Fort for di 6pm pa 7pm.

Komo un gesto enkonekshon ku e selebrashon 25 aniversario ‘The Bahamas National Children’s Choir’ ta regalá Kòrsou un presentashon durante nan stòp promé ku nan subi barku krusero pa kontinuá ku nan gira. E presentashon aki lo ta unu memorabel mirando ku ta trata aki di un kor ku a risibí rekonosementu di bròns durante e di 11 ‘China International Chorus Festival’ i ‘International Federation of Choral Music’ na yüli di 2012. Renaissance Mall i Rif Fort ta invitá pueblo di Kòrsou pa disfrutá di ‘The Bahamas National Children’s Choir’ awe djaweps 16 di yüli, na Renaissance Mall i Rif Fort di 6pm pa 7pm riba tarima den Rif Fort.

Pa mas informashon tokante di ‘The Bahamas National Children’s Choir’ por bishitá nan página di Facebook.