WILLEMSTAD, – Bo ke sera bo fakansi manera un artista? Awèl La Tentashon ta brinda bo e oportunidat pa drenta Summerschool komo un kursista i sali un artista den tres siman di tempu. E aña aki La Tentashon Summerschool lo bai tin vários dosente lokal i internashonal i tin un durashon di tres siman. Kada siman lo konta ku otro dosente, otro tema, otro téknika i otro disiplina.

E promé siman ta di 20 pa 26 di yuli.

E tayer di e promé siman lo ta den man di 4 dosente di ArtEZ Hogeshool voor de kunsten ku lo bini special pa traha un obra ku e hóbennan ku ta enserá tur disiplina, baile, kanto, músika i aktuashon. E siman lo kulminá ku un presentashon den La Tentashon.

E di dos siman

E di dos siman di La Tentashon Performing Arts Academy lo ta den man di dos dosente ku ta studiante di di Toneel Academie Maastricht. Un di e dosentenan aki ta un yu di Kòrsou ku ta studiando na Hulanda i e otro hóben dosente ta un Ghanes ku ta studia na e mesun akademia di arte na Maastricht. Durante di e siman aki nan lo siña e hóbennan vários téknika di teater. E siman aki e hóbennan lo traha riba nan kondishon, postura i posishon riba esenario, uso di stèm i tambe riba improvisashon i kreatividat.

E di tres siman ta un kontinuashon di e di dos siman. E  hóbennan lo traha riba un obra nobo nobo pa presentá esaki komo kulminashon di e Summerschool. E hóbennan huntu ku nan dosente lo hasi uso di nan kreatividat pa traha riba un obra teatral nobo pa demonstrá ku nan a komprondé i por apliká tur e téknikanan ku nan a siña durante di e tres simannan di Summerschool di La Tentashon.

Pa por partisipá na e tres simannan aki nos ta pidi un kontribushon pa por kubri ku e gastunan di e proyekto. E inskripshon ta Naf 25,- anto pa kada siman di e summerschool ta Naf 50,-. Bo por disidi ku bo ta bai un siman so of tur tres.

E inskripshon ta inkluí un T- Shirt di “I Love Luna Blou” i tambe un membercard ku ta duna bo akseso na tur produkshon di La Tentashon i Luna Blou pa un aña largu risibiendo 10% te 100% di deskuento.

Si abo of bo yu tin pensa pa kuminsa den augustes ku La Tentashon Performing Arts Academy, nos akademia di arte kaminda e muchanan ta siña i traha riba diferente presentashon, e summeschool lo ta kompletamente gratis.

Pa mas informashon tokante di nos Summerschool of La Tentashon Performing Arts Academy, tuma kontakto ku teater Luna Blou na

462-2209 òf yama 522-8525 òf 524-8525. Por bishita nos website www.lunablou.com  òf mail nos na production@lunablou.com