WILLEMSTAD – Apesar ku AVA Airways a entrega tur dokumento pidí pa Minister Camelia –Romer, te ku e dia di awe nos no a risibí ningun korespondensia bek, ku ta indiká ku e proseso ta kanando. Te na e momentunan aki, AVA Airways ( kontrali na loke tabata sosodé den pasado kaminda Gobièrnu ta manda un karta informá di a risibí bo karta i ku ela keda di buk bou di tal i tal number), te ku dia di awe nos no a risibí konfirmashon ku nos kartanan a keda entrega i ku nan ta den e proseso.

HISTORIA DI KARTA

Dia 28 di aprel 2015 Minister interino di Tráfiko i transporte Dr. Jose Jardim ta manda nos un karta. Dia 4 di mei 2015 nos ta kontesta e karta aki. Resultado di e karta aki a pone ku nos a  reuní ku Minister Camelia Romer dia 14 di mei 2015. Sinembargo promé ku e fecha di e reunion aki, dia 5 di mei 2015,  Sra. Minister Camelia Romer ta haña un karta for di nos invershonista.

Dia 3 di yüni 2015,  AVA Airways ta risibí un karta di 13 página, kaminda e liña kòrá ta kore ken ta e finansiadonan di e proyekto aki. Dia 11 di yüni 2015 , nos ta manda informá Sra. Minister pa por fabor informá nos ta kon presis e proseso pa un kompania di aviashon por yega na un AOC aki na Kòrsou.  Tambe AVA Airways a  entrega  algun deklarashon finansiero sivil.

Djabièrnè dia 12 di yüni 2015,  via di Federal Express, dos deklarashon sivil  a yega Kòrsou for di Estádos Unídos, kaminda e invershonistanan di Nashonalidat Merikano a manda un karta dirèkt pa Minister ku tur nan datonan.

Dia 18 di yüni 2015, AVA Airways ta manda un karta di follow, pasombra nos no a risibí ningun reakshon, ku ta indiká ku Sra. Minister a risibí e kartanan i ku nan ta trahando riba e proseso.

Dia 29 di yüni 2015  i dia 13 di yüli 2015 tambe AVA Airways a manda Minister Camelia Romer un karta, kaminda nos ta aserka riba follow up di e proseso.

Ku e historia aki, klaramente AVA Airways ta mustra ku e tabata tur transparente i habri den su korespondensia pa ku Minister Camelia-Romer, pero di parti di despacho di Sra. Minister ni di parti di Ministerio di Transporte i Tráfiko no ta risibiendo ningun reakshon o feedback.

Esaki ta laga  e impreshon ku no tin interes den e proyekto grandi aki pa Kòrsou ku pa hopi hende ta un salbashon pa krea hopi kuponan di trabou. Na 2013 DAE a dal su portanan sera i a manda sentenáres di yunan di tera kas.

E grupo aki huntu ku e otro míles di desempleadonan aki na Kòrsou ta pendiente di e bunita proyekto aki, kaminda sin pidi Gobièrnu ni Banko nan lokal ningun depchi, un grupo di invershonista dos tene pa yunan di Kòrsou a mustra e deseo pa kuminsá ku un proyekto di aviashon aki na Kòrsou. Hustamente pa evitá ku AVA Airways lo bai pega ku su kosnan di hasi manera Marketing, manera Branding  i su kontaktonan den Region, nos a bin ta kana dilanti  pa mustra e seriedat ku e proyekto aki tin. No mas ku siman pasa Presidente di AVA Airways, Giovanni Atalita tabata na New York, i a probechá pa kaba di  finalisá e akuerdo grandi ku Tenet di New York, pero tambe a reuní ku CEO di  Caribbean One TV, Sr. Vic Ray relashona ku un kanal di televishon ku ta bai transmití tantu na ingles, spaño, franses i papiamentu. AVA Airways Curacao lo tin un rol grandi den uni islanan di Karibe ku otro.

Tambe Presidente di AVA Airways a hiba kombersashon ku  representante di  Capital Partners i Grace Aviation  Holding LLC riba nan aporte den e proyekto bunita aki pa Kòrsou.  Nan ta pendiente pa por ronde af tur kos i  start op dje kompania. AVA Airways ta sigur ku e proyekto aki ta unu bon pa Kòrsou i p’esei mes ku firmesa nos ta sigui pa dilanti, pendiente di e desishon di Minister Sra. Suzy Camelia –Romer, ku mester informá nos, si òf no. Pueblo di Kòrsou ta esun ku tin pasenshi i ta wardando riba e resultado final.  Ya e finansiadonan ku ta Merikanonan a duna di nan parti i por a screen nan pa sa presis te ken nan ta. AVA Airways ta keda positivo i nos ta konvensí ku sano huisio lo prevalesé den e kaso aki, kaminda na final ta e pueblo di Kòrsou lo ta e gran ganador.