Djadumingu último a klousurá e siman di Media Bootcamp 2015 ku un tremendo anochi di pelíkula, kaminda partisipantenan a presentá e produkshon ku nan a traha den grupo durante di MBC2105.

Media Boot Camp ta un inisiativa di Media School Curaçao ku tin komo meta pa engrandesé konosementu di produkshon di media riba un nivel profeshonal na Kòrsou. Tópikonan ku a wòrdu tratá durante siman tabata entre otro téknikanan di grabashon, marketing, fotografia, script writing, graphic design, aktuashon, produkshon i efekto visual. Un kantidat grandi di pofeshonalnan tabata esnan ku a forma parti di e tim di oradornan ku a trese workshòpnan di kalidat pa tur ku tabata presente.

MBC 2015 tabata di nivel profeshonal i por a konta ku alrededor di 75 partisipante, kual tabata konsistí di un kantidat grandi di hóbennan pero tambe adultonan. E bootcamp tambe tabata unu basta intensivo, kaminda e partisipantenan no solamente a risibí teoria pero tambe retonan kaminda nan mester a buta loke nan a siña mesora den práktika durante di diferente tarea.

Komo reto final, a klousurá e siman di Media Boot Camp 2015 ku un tremendo Movie Award Night, kaminda a presentá e 9 pelíkulanan ku e partisipantenan a produsí durante siman i a repartí tambe sertifikado i medaya pa tur esnan a terminá e seminario ku éksito. Na e okashon aki, kuerpo di hurado a otorgá gruponan ku a sobresalí premionan pa, por ehèmpel, e mihó skrept, mihó aktuashon, mihó produkshon i tambe mihó pelíkula. Tambe a repartí diferente premio pa partisipantenan ku a konkursá i destaká ku nan potrèt den e kompetensha di potrèt ku tabatin.

Media Boot Camp 2015 por a konta ku yudansa di diferente kolaboradó i e tim ta sumamente agradesidu pa esei. Ta tur esakinan huntu a hasi e Media Boot Camp un éksito. Pa mas informashon i potrèt por subi www.mediaschoolcuracao.com.