Recientemente UNOCA a organisa un exitoso programa vacacional pa nos muchanan na Scol di Arte na San Nicolas. Ta trata aki di Arte Activo Kids Camp unda kier crea participacion activo den arte y cultura serca e grupo mas hoben di nos comunidad. Un total di 87 mucha a participa pa un siman largo siñando diferente disciplina di arte entre otro pintamento, traha storia, baile, canto, toca instumento, traha obra di man, come saludabel, arte visual y e muchanan a te hasta haya un tayer special di Santa Rosa.

Pa finalisa e siman di Arte Activo Kids Camp, e muchanan a duna un presentacion dilanti mayornan orguyoso y invitadonan special. Minister Otmar Oduber a felicita UNOCA cu e tremendo iniciativa aki cu ta brinda e oportunidad pa inculca cultura serca nos hobenan. Minister ta comenta: “Ta bunita pa mira con muchanan di tur parti di Aruba a participa den Arte Activo Camp. Cultura no ta limita na un parti di nos isla so, pero ta biba bou di tur hende cu ta forma parti di nos comunidad. Ta nos ta forma nos cultura.” Sr. Oduber ta referi na e importantancia pa na un edad asina hoben, e muchanan haya e interes pa nos cultura. E mandatario ta bisa: “Den un forma recreativo, unda te hasta e propio muchanan a comenta cu un siman ta cortico, por mira e interess grandi pa nos cultura. Esey ta e intencion, inculca cultura den nos muchanan pa nan por sigui transmiti esaki pa e futuro generacionan y sigui garga nos cultura bai dilanti.”

Maestronan a traha duro cu hopi amor pa siña e muchanan tur e diferente disciplinanan y a keda hopi satisfecho cu nan presentacion. Mirando e exito di Arte Activo Kids Camp, mayornan a haci e peticion na UNOCA pa extende e programa cu por lo menos un siman mas pa por acomoda mas mucha pa nan por participa.