Willemstad – Curaçao Airport Partners NV (CAP) a risibí e konfirmashon di American Airlines ku for di djasabra 19 di Desèmber 2015 e aeroliña lo kuminsa un servisio semanal for di Charlotte North Carolina pa Curaçao International Airport na Kòrsou. American Airlines lo hasi uso di e avion tipo Airbus 319 kual tin 128 asiento. Charlotte ta e ‘hub’ di mas grandi di American Airlines den e region Medio Atlántiko di Merka i e buelo semanal nobo aki lo ofresé e biahero un ‘airport gateway’ adishonal pa por biaha pa i for di Kòrsou. E servisio nobo tambe lo fasilitá biahenan kaminda mester hasi uso di mas konekshon pa i for di Kòrsou i siudatnan grandi manera Atlanta, Washington DC, Baltimore, Chicago, Dallas, Phoenix, Los Angeles, San Francisco i otro siudatnan grandi, pa medio di e hub benefisioso aki.

“Nos ta hopi kontentu ku e anunsio hasi awe dor di American Airlines, un di nos importante partnernan den aviashon”, CEO di CAP Ralph Blanchard ta indiká. “E servisio nobo aki ta komplementá nos aktual red di konekshon, lo fortalesé partikularmente e presensia di e nòmber di Kòrsou den e poténte region Medio Atlántiko na Merka, i tambe lo mehorá e konektividat for di otro parti di Merka pa medio di e ‘hub’ fuerte kual ta Charlotte. E servisio nobo tambe ta aliñá ku e ‘Curaçao Tourism Master Plan’ nobo ku tin komo enfóke pa oumentá biahe for di Estados Unidos i e parti nort di Merka pa Kòrsou. CAP ta kontentu di por forma parti di e esfuersonan pa kontinuamente mehorá i ekspandé servisio aéreo pa Kòrsou, i ta anhelá pa sigui kolaborá ku nos partnernan stratégiko CTB i CHATA pa hasi e servisio nobo aki éksitoso pa American Airlines i pa Kòrsou. Nos ta spera mas anunsio tremendo manera esaki den e lunanan i añanan benidero.”