…CTB ta presentá dia 27 di Sèptèmber próksimo…

WILLEMSTAD- 17 di sèptèmber 2013 – Ya no ta falta hopi pa selebrá e dia internashonal dediká na turismo; ‘World Tourism Day’. Riba e dia aki CTB lo duna realse na tur ku ta traha den turismo, òf ku indirektamente ta forma parti di turismo aki na Kòrsou. Riba dia di selebrashon di ‘World Tourism Day’ CTB lo presentá un konferensiá; esaki den kuadro di su kampaña ‘Dushi Hende’. E konferensiá titulá: ‘Service Excellence Conference’ lo tuma lugar dia 27 di Sèptèmber próksimo. E konferensiá lo wòrdu dividí den dos seshon, e promé seshon lo ta dirigí spesialmente riba tur empleadonan ku ta den kontakto direkto ku e kliente i lo focus riba nan abilidat i komportashon komo esun ku ta duna servisio. E di dos seshon lo ta un almuerso kombiná ku un presentashon spesialmente pa mènèdjer. Durante e almuerso kombiná ku presentashon e orador lo presentá e partisipantenan ku e hèrmèntnan nesesario pa konstruí un kultura di trabou ku konstantemente lo produsí servisio ekselente. E oradornan ku lo duna presentashon durante e ‘Service Excellence Conference’ lo ta; Sra. Sandra Husbands for di Barbados, e tin mas ku 20 aña di eksperensia komo konsehero profeshonal ku un lisensia den Sosiologia i Lei, ademas di esaki e tin un lisensia riba nivel di Master den International Trade. Sra. Husbands ta versá den: training, management consulting, tourism, sales i market research. Tambe lo tin presentashon di Dr. Carolin Rekar for di Canada, ku ta manehá un consulting agency na unda e ta asesorá ehekutivo i lidernan di empresa riba change management, employee engagement, strategic planning, performance management, developing and sustaining high performing teams, succession management i leadership development. Dr. Rekar a risibí su lisensia riba nivel di master i tin un doktoral na Universidat di Toronto riba desaroyo di rekurso humano i liderazgo. Tur esnan ku ta deseá di partisipá na e ‘Service Excellence Conference’ por yama; 434 8225 òf 434 8224. Ta bon pa menshoná ku registrashon lo ta posibel te dia 20 di Sèptèmber i lo kobra un kontribushon di 55.00 florin pa e almuerso i 125.00 pa e konferensiá. Pa studiantenan tin un tarifa spesial di 35.00 florin pa partisipashon na e konferensiá. Tur registrashon ta inkluí material i lùnch. CTB ta invitá tur profeshonalnan den benta, profeshonalnan di rekurso humano, lidernan di proyekto, trainernan, mènèdjer, konseheronan profeshonal i tur persona ku den nan trabou diario tin di haber ku dunamentu di servisio, pa partisipá na e ‘Service Excellence Conference’ pa huntu nos amplia nos konosementu i desaroyá nos abilidatnan pa asina kontribuí na ekselensia i kresementu positivo di turismo na Kòrsou.