Fakansi Musikal 2015 ta ranka sali djaluna 13 di yüli ku 120 mucha i 10 musiko profeshonal/profesor di musika di Spaña. Durante dos siman, di 13 pa 25 di Yüli, muchanan di Kòrsou lo tin kombibensia ku 10 musiko boluntario for di Spaña pa realisa e proyekto Fakansi Musikal 2015. Fakansi Musikal ta un kampamentu musikal ku lo tuma luga na Landhuis Klein Kwartier danki na Lions Club Curaçao ku a sede e landhuis kompletu pa hasi e kampamentu aki posibel. Pa e proyekto aki e dos organisashonnan Jazz Island Promotions Curaçao (JIP-C) i Plataforma REDOMI di Spaña, ku sosten di Curaçao Lions i Destination Curaçao a uni forsa pa bin ku un aktividat úniko pa nos muchanan den tempu di vakashon. 10 músiko profeshonal/profesor di músika a bin speshal for di Spaña pa pasa un vakashon di 2 siman na Kòrsou i den nan fakansi duna lès di muzik i instrukshon na ±120 mucha i hoben entre 6 – 18 aña i di diferente organisashon sosial na Kòrsou. Fakansi Musikal ta parti di un festival di integrashon kaminda e musikonan di Spaña aki lo tin aktividatnan di interkambio ku musikonan lokal. E fesitval aki lo ta e medio via di kua musikonan di Spaña ku ta partisipá komo profesornan boluntario den fakansi musikal Kòrsou lo konosé nos kultura for di baluartenan importante di nos kultura. E musikonan di Spaña lo komparti esenario ku musikonan rekonosi manera Ced Ride i Tipiko Pasa Bon i di otro banda nan lo ofrese un Noche Española, kual lo ta un espektakulo ku musika, baile i kanto Spañó kompaña pa e sabornan kulinario di Spaña. Fakansi Musikal Kòrsou ta un proyekto musikososial. Un proyekto di transformashon sosial pa medio di musika ku ta ofrese muchanan i hobennan prosedente di sektornan mas nesesitá di nos poblashon e oportunidat di eksperensia un fakansi diferente ku formashon riba tereno di balornan pa via di musika.

Aktividatnan pa publiko

Lo tin varios aktividat pa publiko durante e dos simanan. Lo tin 2  workshop gratis i lo tin 4 konsierto pa asina rekouda fondo pa por kubri e gastunan di e proyekto. Tur e eventonan publiko aki lo tuma luga na Brakkeput Mei Mei. Workshopnan lo ta pa e musikonan ku ta bishitá nos pero públiko interesá tambe  por  partisipa. Lo tin 2 workshop, unu dia 13 di Yüli ‘Curaçao Dances’, di 6or – 8or anochi na Brakkeput Mei Mei i e otro workshop lo ta dia 15 di Yüli 60r-8or di anochi i e lo trata ‘History of Curaçao Music with Harry Moen’. Entrada pa tur e dos workshopnan ta gratis. Lo tin un konsierto folkloriko ku Tipiko Pasa Bon den koperashon ku e musikonan di Spaña dia 18 di Yüli 8or-9:30 anochi. Dia 22 di Yüli lo tin un Noche Española kaminda nos musikonan boluntario for di Spaña lo ofrese un konsierto ku kanto i baile flamenko i musika folkloriko di Spaña. E Noche Española lo ta di 7or-9or anochi na Brakkeput Mei Mei. Tambe lo tin un konsierto ku Ced Ride i Folklor dia 23 di Yüli 7or-9or. E anochi ku Ced aki lo ta ku akompañamentu di Sonidos de España. Dia 25 di Yüli, e ultimo dia di e Fakansi Musikal, lo tin un konsierto final kamida tur e muchanan lo presenta pa un publiko grandi un show musikal kaminda tur 120 mucha lo tin un rol. JIP-C i Fundashon Redomi ta konta ku partisipashon masaal di pueblo na e diferente eventonan. Karchi pa tur 4 konsierto ta na benta na Mensing’s Caminada, Bruna i Albert Heijn of por yama 510-2863 of 510-8443 pa karchi. Bishita nos Facebookpage www.facebook.com/fakansimusikal pa detaye.