WILLEMSTAD, – La Tentashon Performing Arts academy ta bai kuminsá ku  su aña eskolar nobo i ta opsekiá su alumnonan nobo tres siman di tayer kompletamente grátis. Inskribí awor i partisipá den La Tentashon su Summerschool kompletamente grátis. Durante dos siman nos hóbennan 10 aña pa 16 aña lo haña oportunidat di haña formashon riba vários área artístiko manera: aktuashon teatral i pelíkula, baile, músika i kanto. Durante di e simannan aki lo bai tin vários dosente lokal i internashonal ku lo ta kla pa yuda e hóben desaroyá su talento i traha den tres siman riba un produkshon nobo. E tres simannan di tayer ta bai kulminá ku un wikènt di presentashon pa públiko den La Tentashon. E tayernan aki lo sirbi  komo introdukshon pa e hóbennan ku lo forma parti di La Tentashon Performing Arts Academy integrá ku otro i kuminsá kustumbrá ku e loke ta warda nan pa e aña eskolar nobo. La Tentashon Performing Arts Academy tin dos sistema. E sistema di “naschoolse opvang” i e sistema di kursonan di atardi. E sistema di “naschoolse opvang” ta enserá ku e hóben ta sali skol i bin La Tentashon. La Tentashon ta brinda e hóben un espasio kómodo ku e por kome i despues traha hùiswèrk bou di guia di dosente. 4or pa 6or di atardi e hóbennan lo risibí formashon artístiko. Tur dia nan lo haña un disiplina diferente. E kuríkulo artístiko ta enserá: Aktuashon i Poesia, Baile i moveshon, Kanto i músika, Pelíkula, Aspektonan tékniko di teater i mas. Pa partisipá na La Tentashon Performing Arts Academy bo ta paga un kontribushon di Naf.200, – pa luna i inskripshon ta Naf. 50, – Si bo inskribí i paga promé ku dia 20 di yüli bo por partisipá na La Tentashon Summerschool kompletamente grátis.

Kursonan di atardi

Parti atardi di 5or pa 7or, La Tentashon Performing Arts Academy ta duna diferente kurso. Abo ta skohe kua kurso bo kier sigui. Ta bai tin kurso di: Aktuashon i Poesia, Baile i moveshon, Kanto i músika, Pelíkula, Aspektonan tékniko di teater i mas. Pa e sistema di kursonan di atardi bo ta paga pa kada disiplina ku bo ke hasi. Kada disiplina ta kosta Naf.100,- pa luna. Inskripshon ta kosta Naf. 50, -. Si bo inskribí i paga promé ku dia 20 di yüli bo por partisipá na La Tentashon Summerschool kompletamente grátis. Pa inskribí ta fásil: Mester pasa na teater Luna Blou i yena e formulario di inskripshon i paga mesora e kontribushon di registrashon i e promé luna di kontribushon. Lo bo risibí un “membercard” ku lo bo por risibí for di 10 te ku 100% di deskuento pa drenta tur produkshon di La Tentashon i teater Luna Blou i tambe un T-shirt di “I Love Luna Blou”. Pa mas informashon por yama Teatro Luna Blou na +5999 462-2209/ +5999 524-8525 òf +5999 522-8525.