Willemstad – CDM i FEFFIK a firma un akuerdo di koperashon ku ta enserá ku e instituto di formashon ta ofresé hóbennan kuater diferente ramo di fishi. Nan ta lasser/brander, ijzerwerkers/pipe fabricators, stralers/schilderen i machine bankwerkers. A firma e akuerdo aki na FEFFIK Training Center A.J. Colin Valerian na Brievengat. Diferente orador a hiba palabra, entre nan sra. Emelyn Solomon, presidente di direktiva di FEFFIK, sr. Ludwig Alberto, direktor interino, sr. Getmar Caldera di CDM Holding, sr. Palm, minister di Ekonomia i sra. Irene Dick, minister enkargá ku FEFFIK. Sra. Solomon den su diskurso a enfatisá ku firmamentu di e akuerdo ta di sumo importansha pa espesialmente nos hóbennan. “Diariamente nos ta tende den komunidat ku nos hóbennan ta karesé di e abilidatnan nesesario pa drenta den e proseso laboral. No tin hendenan di fishi ta un gritu ku konstantemente nos ta tende. Tin ku importá trahadónan di eksterior pa yena e bashí ku tin riba nos merkado laboral. Esaki sigur no ta na benefisio di nos hóbennan. E akuerdo aki ta netamente pa atendé ku entre otro e puntonan ku a kaba di menshoná” di akuerdo ku sra. Solomon. Sr. Caldera tambe a mustra e importansia di e akuerdo di trabou aki. E la gradesí  ministerio di SOAW, ministerio di Enseñansa i ministerio di Ekonomia pa nan aporte. Ku e kontribushon aki no ta nesesario importá trahadónan di afó. Den presensia di tur e stakeholders a firma e akuerdo di koperashon ku tin un durashon di dos aña i  ku un montante di kasi 950 mil florin envolví.