Nan lo bai ofresé e spit di data mas haltu- rònt Kòrsou

WILLEMSTAD: Digicel e proveedor di komunikashon mobil lider den region ku instalashonnan aki na Kòrsou tambe, semper ta hasi su esfuersonan pa keda inová i mehorá su servisionan. Aktualmente e kompania ta den un proyekto di ekspanshon na unda ku ta hasiendo trámitenan pa ekspandé e kapasidat di nan nètwèrk i asina akomodá e kresementu inmenso den usuario. E pronóstikonan den kantidat di usuario ta mustra únikamente kresementu, esaki ta hasi ku uso di data lo bira aun mas tantu. Pa evitá kualke inkumbiniensia, nos a kuminsá un proyekto di ekspanshon proaktivo.

E ‘upgrade’ hasí dor di Digciel ta hasi posibel ku su klientenan por eksperensiá spitnan ku ta dòbel di loke ta keda ofresé normalmente. Promé ku e upgrade e spitnan no tabata surpasá 7 Mbps.  Despues di e upgrade e spit promedio a bira entre 10 pa 20 Mbps. Di e forma aki, Digicel ta ofresé e spit mas haltu na Kòrsou. Di akuerdo ku e último estudionan tékniko, aktualmente e spit promedio ta 15 Mbps. Digicel a hasi e upgrade aki pa tur usuario; tur kliente por eksperensiá e spit di entre 10 ku 20 Mbps- rònt Kòrsou i no únikamente den sierto áreanan.

Digicel ta sigui hasi su esfuersonan pa tur usuario tin un eksperensia plasentero sea ora di komunikashon telefóniko of na momentu di usa data. “Nos ta konsiente ku uso di data a bira hopi importante durante di e último añanan. E idea di tin mundu den ‘bo man’ via di Social Media, atendé negoshi òf simplemente disfrutá di un tempu liber riba Internèt- tur ta rekerí un velosidat haltu pa ‘download’ òf ‘stream’. E proyekto di ekspanshon proaktivo lo garantisá ku miéntras nos komo kompania ta sigui mira kresementu den usuario, tur kliente eksistente por sigui eksperensiá uso di data konfiabel i lihé”, esaki di akuerdo ku Sr. Hans Lute, Direktor di Digicel Kòrsou.