Minister Otmar Oduber a ricibi un invitacion pa conoce mas di serca y mira e ultimo desaroyonan pa locual ta trata e organisacion di Mascaruba. Den e Cueba di Mascaruba e mandatario a ricibi un presentacion extensio di e plannan pa reviva e arte di teatro riba nos isla. Mester mentiona si cu e organisacion no ta enfoca solamente riba e aspecto di arte teatral pero riba tur arte.

Algun siman pasa directiva di Prins Bernard Fonds tambe tabata di bishita dunando Mascaruba un empuhe pa nan sigui den e bon direcion. Cu fondonan limita nan ta ambisioso pa crea un centro pa artistanan, pa trabou artistico y tambe pa presentacion. Kier brinda e posibilidad pa e artistanan renombra riba nos isla, educa e futuro generacion basa riba tur e diferente disciplinan di arte. Por ehempel arte visual, fotografia, arte plastico, musica pero cu un concentracion riba teatro.

Minister Oduber a keda sumamente impresiona cu e presentacion y cu e vision firme pa futuro di un organisacion cu tin casi 55 aña di exsistencia. Sr. Oduber ta bisa: “E energia positivo pa sigui inculca arte den nos talentonan local ta di suma importancia.” Minister na su turno a ofrece assistencia pa sera e contactonan necesario pa segura continuacionan di proyectonan na caminda.

Director di Mascaruba a keda sumamente satifecho cu e bishita y cu e seguransa di tin e sosten di Minister Oduber pa futuro proyectonan na bienestar di nos cultura.